tlhIngan-Hol Archive: Tue Jul 29 11:33:37 2014

Back to archive top level

To this year's listing

[Date Prev][Date Next][Thread Prev][Thread Next]

[Tlhingan-hol] leng QonoS: rInDI' qep'a'

Alan Anderson ([email protected])

From: Alan Anderson <[email protected]>
Subject: [Tlhingan-hol] leng QonoS: rInDI' qep'a'
Date: Tue, 29 Jul 2014 14:33:07 -0400
List-archive: <http://mail.kli.org/pipermail/tlhingan-hol/>
List-id: <tlhingan-hol.kli.org>
List-subscribe: <http://mail.kli.org/mailman/listinfo/tlhingan-hol>, <mailto:[email protected]?subject=subscribe>

qepHomvo' juHwIjDaq jIghoSmeH, yav leng tIq vISIQnIS.
qorDu'wIj vIHIj. nutlhej janSIy. nutlhej je 'arHa.

DungluQ matlheDpu'. taghpa' leng'a' nIn vISuqnISmo' loQ mamImlu'.
tIn yavDujwIj 'ej nIn law' poQ. nIn qutlh vIje'meH New Jersey vIghoS.
Huch vIchoqbogh law' law' QI rup vIDIlbogh law' puS, 'ej
Pennsylvania Turnpike 'ay' vIghoSbe' latlh Huch vIchoq.
Do'Ha' DujwIj tebchu'be' tebwI'. wa'vatlh cha'maH tlho'ren poQ 'e' vIpIH.
nIn Suy vImejpa' tlho'renmey vI'olbe'. HeDaq maghoSqa'DI' Seng vItu'.
buy'be' nIn ngaSwI'. chorghmaH tlho'ren neH Hevpu'.
vaj tlhoS rap Huch vIchoqbogh, QI rup vIDIlbogh je, 'ej poH natlhlu'.

toH, tagha' Turnpike-Daq maghoSchoH 'ej tagh leng'a'.
HuDmeyDaq Sormey DIlegh. jul lubot 'engmey. manoS. 'ochmey DIvegh.
HemajDaq loS 'och DIveghnIS. qIt vaghDIch, 'ach qIgh nI' law' He tIq nI' puS.

'etDaq 'och Qav vIlegh. pay' wab qab vIQoychoH: ft-ft-ft-ft-ft-ft-ft-ft-ft...
jIchungHa'DI' nom wab vIghov. narghtaH rutlh muD. nIjlI' Duj poS rutlh. Do'Ha'.
SIbI' Duj vImevmoH 'ej Seng vI'ol. tunchoH poS 'et rutlh. Do'Ha'qu'.
letHa'chu'pa' rutlh, QaplaHtaHvIS, Duj vIvIHqa'moH 'ej He chach mIch vISIch.
pa' ghu' wIchov jIH raQpo'wI'pu' je. Qobbe' Daqmaj. wovtaH pem. tujqu'be' muD.
rutlh qa'meH tu'lu', 'ej jommeH luch qeng Duj. vaj tammeH mIw wItagh.

Duj pepwI' vItlhap 'ej vIlaghHa'. rutlh veragh vIl vIQeyHa'choHmoH.
rutlh qa'meH QanwI' teq latlhpu'. pay' qay'qu' ghu': rutlh chu' wIteqlaHbe'.
veragh vIlDaj mach law' QeyHa'moHwI' mach puS. DIDIngmoHlaHbe'.
nom qech chup 'arHa, 'ej mIw muqawmoH qechDaj. tlhegh 'oH wa' tepmaj'e'.
QeyHa'moHwI' vIghoDmeH qoDDaq tlhegh 'ay vIlan.
ghIq veragh mach 'uchlaH 'ej tlhe'moHlaH nuHmaj.
rutlh chu' wIteq. Duj wIpep. rutlh Duy' wIjomHa'. rutlh chu' wIjom.
chu'wI' veragh rIl DIQeymoHchu'. tlhegh wIlo'qa' 'ej rutlh ngo' wIrar.
QanwI' tatlhlu'. ghopDu'maj DISay'moH.

letchu'be'mo' chach rutlh, muD ghoSmoHwI' mach vIrar 'ej vIchu'.
QIt tetchoH rutlh. qaStaHvIS cha'maH tup rutlh teb ghoSmoHwI'.
SISchoH 'engmey. loQ SIS, vaj qay'be'. tlhoS rInDI' mIw, mughoS boQ yaS.
QaHDaj'e' wIpoQbe'. Dun Dujmaj beq! wa' Dol nIvDaq matay'DI' maQap!

maghoSqa'. SIbI' 'och Qav wIvegh. qetlhchoH leng. HurghchoH ram. Qong 'op.
numImmoHqu'mo' rutlh chach, ramjep wej juHwIjDaq maHtaH.
wa'logh Qoylu'pu'DI' tagha' Dor HoqwIj'e'.
ghIq leng 'ay' Qav taghlaH Chicago nganpu'.

lupDujHomDaq HochHom tep vIlon 'ej jIQongchoH. po jIvem. jIDoy'taH 'ach jIyIn.
jaj Qu'wIj motlh vIta'qa'.

jIghIQ vIneHqa'.

-- ghunchu'wI'

_______________________________________________
Tlhingan-hol mailing list
[email protected]
http://mail.kli.org/mailman/listinfo/tlhingan-hol

Prev by Date: Re: [Tlhingan-hol] qep'a' Proverbs
Next by Date: [Tlhingan-hol] Klingon Word of the Day: jotlh
Previous by thread: Re: [Tlhingan-hol] Klingon Word of the Day: par
Next by thread: [Tlhingan-hol] Klingon Word of the Day: jotlh
Index(es):