tlhIngan-Hol Archive: Wed May 16 07:01:48 2012
[Date Prev][Date Next][Thread Prev][Thread Next]
[Tlhingan-hol] nuq bop bom: 'ay' wa'vatlh HutmaH: nejtaH negh
Essim and Mahoun are in the water, clinging to a bush hanging from
the cliff that forms the bank of a river.
190: nejtaH negh
ngaD'eghmoHtaHvIS bIng pupDI' 'eSSIm vay' tu' qamDaj. Qamchu' 'e'
leghDI' Mahoun jatlh, "nuq Dagho'taH?"
jatlh 'eSSIm, "QemjIqHey." 'oHDaq QamchoHlaHmeH je Mahoun nech 'eSSIm.
tlhIngan ghogh luQoy. jatlh, "bIQDaq ghIrpu'. jaQqu'. yInlaHbe'bej.
yInIDqa'. ... ghobe'! vIleghlaHbe'. bIQtIqDaq chaHtaH. ... luq, qaH."
Dungvo' jatlhchoH latlh ghogh. jatlh, "ghu'maj luyaj'a'?"
jatlh ghogh wa'DIch, "vIHon. DaH rapmo' ngoq, ghu' teH je, mIS.
SuDwI' wIghajtaH 'e' luHarlaw'. chay' narghta' 'e' Dachaw' jay', toDSaH?"
jatlh ghogh wejDIch, "pIch ghaj jol. vIghaj 'ach lujDI' jol nargh.
chIch Supta'mo', taQ. HoH'egh 'e' pIH 'Iv? <yIQIHQo'> ra'mo', pe'vIl
vI'uchqu'be' 'ej DaH Heghpu'mo' ... muSurgh Sa'." choltaH ghoghmey.
qojmey yorDaq yItlaw'taH nejbogh negh. vIHbe'choHchu' 'eSSIm. nagh
Hurgh rur DIrDaj 'ej lavmey rur jIbDaj. Mahoun DIr SuD So' 'e' nID 'eSSIm.
purqu' Mahoun ghIq bIQDaq ghIrchoH. 'eSSIm 'uS Hot ghIq ngablaw'pu'.
loStaH 'eSSIm. bIngDaq 'uS joqmoH. Mahoun SamlaHbe'. qaStaHvIS tupmey
loStaH. juSlI' ghoghmey. tlhuHnISbe''a' Mahoun? lonta''a'? 'eSSIm
DechtaH bIQ narghlaHbe'bogh. lImrupqa'. cholHa'lI'mo' nupchoH
ghoghmey 'ach DachtaH Mahoun. tagha' 'eSSIm 'uS Hotqa' Mahoun ghop.
bIQvo' nargh Mahoun nuj neH. pur ghIq tlhupchoH. jatlh, "DIS QaD
vISamta'. HIghoS." ghIrqa' Mahoun.
purqu' 'eSSIm 'ej Mahoun tlha' 'e' nID. bIQDaq qabDaj lanta'DI'
lImchoH 'ej Qamqa'. chegh Mahoun. ngechDajDaq Mahoun nach SuD So'
'eSSIm. jatlh, "bIQDaq qatlha'laHbe' ..."
jatlh Mahoun, "Data'laH. wa' ghop vIlo'taHvIS vIta'laH. qaStaHvIS
wejmaH lup bItlhuHbe'laHtaH'a'?"
jatlh 'eSSIm, "HIja', 'ach ... DIn vISamlaHbe' ... " bIQDaq ghIrvIp
'eSSIm. DechDI' bIQ lImchoH 'ach chID neHbe'. Mahoun nach 'uchqu'.
jatlh Mahoun, "bangwI', HIvoq." qam pepmeH bIQDaq SIH'egh Mahoun.
qamDajDaq 'eSSIm ghop lan. jatlh "DaH yItlhuHqu'." lob 'eSSIm. jatlh
Mahoun, "DaH qaDev. HI'uchtaH. mInDu'lIj tISoQmoH DaneHchugh."
tlhuHqu' Mahoun ghIq tlhuHbe'choH 'ej ghIrchoH. mInDu'Daj SoQqu'moH
'eSSIm 'ej luHchoHDI' Mahoun qam Dev 'e' chaw'.
--
SKI: While hiding from soldiers who are searching for them, Mahoun
reports finding the underwater entrance to a cave.
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol