tlhIngan-Hol Archive: Thu Jul 19 09:53:11 2012
[Date Prev][Date Next][Thread Prev][Thread Next]
[Tlhingan-hol] nuq bop bom: 'ay' cha'vatlh wejmaH vagh: pa' meq
vajar finally saw a Klingon head explode.
CONTENT: Death, injury and corpses, but no gore.
235
pa' meq
rav muppu'pa' ghutar lom, yov lotlhwI'pu'. loQ
'avwI'pu' vaQHa'moHlaw'pu' ghutar SoQ 'ej
lotlhwI'pu' rachqa'moHqu'bejpu' HeghDaj. yov je
vajar 'ach rIghmo', pa' SIchDI' Heghpu' pagh
Haw'pu' Hoch 'avwI'pu'. Haw'wI' HoHmeH tlha' 'op
lotlhwI'pu'. pa''e' lu'avta'bogh 'avwI'pu'
lu'elmeH vajar, Hota'ro' je, 'avwI'pu' lommeyDaq
gho'. qImyal Hegh lubej luneH. 'ach chIm pa'.
chImchu'. baS nIt neH bIH Hoch tlhoy'mey'e'.
qImyal lunejmeH mejtaH lotlhwI'pu'. lomvo' nISwI'
tlhap vajar. va'nuchDu'DajDaq QamtaHvIS, tlhoy'
nuDchoH. pegh So'laH'a' pa'? baS motlh 'oHlaw'.
'avwI' pa' Huj 'oH, quS, nIch, Soj je Hutlhbogh pa''e'.
vajar 'emDaq vIH vay'. Dujmo' tlhe''egh vajar.
nISwI' beH qengbogh 'avwI' legh. pa' chImDaq
vajarDaq bachlaHchu' 'avwI' 'ach SIbI' bachbe'.
nechchoH 'avwI'. 'avwI'vam SIghta''a' ghutar SoQ?
ghIq bach 'avwI'. vajar 'uS qIp tIH.
<i>ghuy'cha'!</i> 'oy'qu' 'ach quvtaH may' 'oy'.
'avwI'Daq bach vajar 'ach tIH bot 'avwI' yoD Sut.
Qeqqa'lI' 'avwI', 'ach nechDI' vajar bachbe'
'avwI'. pay' pa'vam Huj ghov vajar 'ej 'avwI' to'
yaj. HIchDal tIn 'oH pa'vam'e'. ra'wI'DajDaq
bachbe'meH SIbI' bachbe'ta' 'avwI'. vajar, 'avwI'
je jojDaj So'lu'bogh Duj mach tu'lu'. DujHey
ghoSmeH vajar nom vIH. lugh vajar. choghvatHey
Sam vajar ghop. nISwI'vaD HoS 'aqroS wIv vajar
'ej nechDI' 'avwI', ghaHDaq Qeq 'ej tIH bachtaH.
pumDI' 'avwI' DujHey tIj vajar. lupDujHom 'o' qoD
legh. qImyal leghbe' 'ach 'etvo' jatlh qImyal
ghogh. jatlh, «yIyong. Hegh latlhpu' HIchDal vIpoSmoHDI'.»
tepDaq QotchoHtaHvIS vajar, Hota'ro' legh. tIjlI'
vajar 'e' leghlaw'mo' Hota'ro', pa'
lojmIt--HIchDal lojmIt--veghlI'. ghuHmoH vajar
ghop pep. Qoybe'meH qImyal jatlhbe'. yev Hota'ro'
ghIq ghaH 'emvo' Hota'ro' 'uchchoH 'avwI' tInqu'.
«Qo'!» jatlh 'avwI'. gharon ghaH. gharonDaq bach
'e' nID vajar 'ach nISwI' chu'DI', tIH lIngbe'.
'avwI' HoHmeH Hoch HoS natlhpu'. yaS wa'DIchDaj
Hub neHqu' vajar 'ach qImyal HoHmeH lupDujHomDaq ratlhnIS. bejlaH neH.
--
SKI: gharon finds Hota'ro' as vajar finds qImyal.
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol