tlhIngan-Hol Archive: Sat Jul 14 22:41:48 2012
[Date Prev][Date Next][Thread Prev][Thread Next]
[Tlhingan-hol] nuq bop bom: 'ay' cha'vatlh wejmaH wej: pumDI' lojmIt
tugh wa' wen qaS qep'a'. lutvam vIrInnISmoH! wa'leS ghaytan SISmo' jIQonglaH.
ghutar has rescued vajar from qImyal's torture chamber.
233: pumDI' lojmIt
joy'wI' pa'vo' ghoS vajar, ghutar je. SaH QeHbogh
mang law'[359]. bIghHa'Daq chaHbe'law'taH. «nuqDaq maHtaH?» jatlh vajar.
«qImyal pa'meyDaq maHtaH», jatlh ghutar. «naDev ghaHlaw'taH Sa''e'.»
poStaH wa' lojmIt. pa' ghompu' qImyal, vajar,
Hota'ro' ghutar je, Hung mIwvaD Sapta'pa' ghutar.
pa'vam lu'elmeH lotlhwI'pu', lojmItvetlh
ghorlaw'pu'. DaH latlh lojmIt lughorlI' 'ach
lojmItvam HoS law' lojmIt wa'DIch HoS puS. baS
naQmey, nISwI'mey je lo'taH. bIt vajar. Hung
patmey law' ghaj qImyal jatlh qaH'eng, 'ej
mejpu'mo' qaH'eng QaHlaHbe'lI'. jatlh vay',
«pujlaw lojmIt Dung. pa' yIHIv!» Dung SIchmeH
SupchoH negh jen. ghomvo' chev'egh wa' be' 'ej
qImyal qep pa' ghoS. cheghDI' raS qeng. be' porgh
Ho' vajar. vIHchu' SomrawDaj. najmoH ngech tun,
ghIq be' ghov. Hota'ro' ghaH. ghIHmo' DaQDaj 'ej
ghaHDaq 'Iw law' ngoHlu'pu'mo' ghovbe'pu'.
pay' vay' qaw vajar: not Hota'ro' ngaghmeH
tlhobta' vajar. muj qImyal. Hota'ro'vaD
?QaptaHvIS HughlIj ...? jatlhpu' vajar 'ach
SaDlogh mu'mey nIb ja'pu' 'ej peghbe'. ghaytan
qaw mang law'. ngoDmey'e' ja'law'pu'bogh qImyal
ghoqwI'pu'qoq loylaHbej Sa'. maghta''a'
be'nalDaj? ghobe'! vajar SaHqu'pu' 'ej puqchaj
boghmoH neHbejpu'. QuQmey jojDaq ngagh nuv law'.
«Hota'ro'!» jatlh vajar, «DuveltaHvIS jaghlI' 'Iw
bI'IH!» Hagh Hota'ro', lojmIt tlhopDaq raS
lantaHvIS. raSDaq QamchoH negh 'ej lojmIt Dung HIvchoH.
vajar, ghutar je chol Hota'ro'. jatlh, «Daw'vam
boHarlaH'a'? nabbe'lu'pu' 'ach nIvlaH'a'?»
jatlh vajar, «qa'chajDaq lunabtaH[360]. wa'maH ben Daw'be' beq 'e' vIHarbe'.»
jatlh Hota'ro', «nuvpu' SeHlaHchu' qImyal.»
«jIH muSeHbe'bej!» jatlh ghutar 'ej lojmIt raDwI'pu' muvchoH.
jatlh Hota'ro', «nom qImyal luHoH 'e' vIpay. bech 'e' vImaS.»
ngugh lojmIt lughor. ngaQqu'mo' nechQo' 'ach
Dechbogh tlhoy' luQaw'ta'mo' lupummoH. jach
ghom'a'. «Qapla'!» jatlh 'ej qung veghchoH negh, HoHbeHtaHvIS nuHmeychaj.
«Ha'!» jatlh Hota'ro' 'ej jachbogh negh ghoghmey
lutlha'. rIghmo' vajar, QIt yIt.
pa' lu'elDI' Dachlaw' qImyal. pa' DojmoH Dochmey
wagh. tlhoy'meyDaq may'mey tIQ cha' tlhImmey,
nagh beQmey je. vajar retlhDaq SaH Qo'noS yuQ
'oSbogh Hew. bIQ'a' ghargh'a'mey DubDu'Daq
lIghtaH yuQ moQ. bochbogh nagh qIj HotmeH yev
vajar. ghopDaj pepchoHDI' 'oy'taH volchaH Somraw.
ghaytan nuH quv lo'laHchu'be' vajar, 'ach
potlhbe'. qImyal luHoH 'e' luqotlh bechtaHbogh beqpu'vam.
---
SKI: An angry crowd breaks through door into qImyal's suite.
---
[359] Hmm, I spotted this in editing, but decided
to leave it for comments. The plural of mang is
negh. So can mang alone BE plural, as in mang law', or should I say negh law'?
[360] As I wrote this I started with
yabDu'chajDaj, but then decided it was more
qa'chajDaq, but couldn't decide on a plural
suffix. In this context, is a soul a body part?
Is it sentient? Fortunately Klingon grammar lets me escape without deciding!
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol