tlhIngan-Hol Archive: Mon Nov 21 12:51:03 2011
[Date Prev][Date Next][Thread Prev][Thread Next]
[Tlhingan-hol] vavwI' lut - yIntaghqoq
vengwIjDaq javmaH Hut ben chen chIrgh qach.
vaghmaH cha' ben veng DabchoH vavwI' SoSwI' je.
qaStaHvIS naH jajmeywIj chIrghvam vISovchoH.
bIrDI' muD Dotlh, bIrbe'meH qach bIQ tuj lo'.
tujDI' muD Dotlh, loQ bechnIS chIrgh jaHwI'pu'.
tujmoHwI' patmey yaj vavwI'.
wejlogh QapHa' chIrgh tujmoHwI' pat 'e' vIqaw.
wa'logh Qopmo' qul tlhuDwI' bIQ tujmoHbe'.
wa'logh nIjmo' bIQ 'och QaDchoH pat 'ej tuj QaylaHbe'.
wa'logh mev bIQ ghoSmoHwI'.
nom Hoch Seng ngu' vavwI' 'ej pat tI'.
roD jajmey SeQqu' QatlhmoH jar tuj.
QatlhnISmo' jajmeyvetlh, tuj SIQ Hoch.
qaStaHvIS vaghmaH DIS pIj bepmoH tuj 'ach choH neHlu'be'.
tagha' cha'maH ben bepqu'choH 'op chIrgh jeSwI'.
law' jeSwI' qan.
vaj wuq chIrgh yej.
bIrmoHwI' jomlu' net nab.
qaStaHvIS wa'maH DIS tlhetlhbe' nab.
ghIq nentayHey loprup puqloDwI'.
vangchoH vavwI'.
yIb pat 'ogh.
SeHlaw napqu'moH.
cha' leQ neH ghaj SeHlaw'.
tujmoH pat pagh bIrmoH, 'e' wIv wa' leQ potlh.
Hat wIv latlh.
chImtaHvIS chIrgh qach, vumqu'be' pat.
SaHtaHvIS ghom, Hat pup leH.
Hat leQ SeHlaH 'ISjaH tlhaq.
napmeH SeHlaw, Qatlh SeHwI'.
pat jom veng malja'.
Qapchu'.
Quch Hoch.
vavwI' tlho' chIrgh yej.
qaStaHvIS vagh DIS Quch.
QIt Hatmo' QochchoH 'op.
qach Hat lISlaHbe' nuv.
chIch ghu'vam.
tujmoHwI' pat luyajQo' nuv puS.
Hat lulISDI' pIj tlhoy tujmoH 'e' lura'.
DoS choH 'ach Do choHbe'.
'op yonmoHbe' Hat.
bIr 'op.
tuj 'op.
Hatmo' Qoch chaH, 'ej tujmoHwI' SeHlaw'e' lupIch.
wa' ben QapHa' SeHlaw.
tujmoHwI' chu'Ha'be'.
bIrtaHvIS muD Dotlh tujqu'taH qach.
Seng ngu' vavwI'.
wa' Hat leQ ngepmeH 'ul SIrgh rar.
qaStaHvIS DIS poH bIr Qap.
tujqa'DI' muD Dotlh, 'ul SIrgh teq.
bIrqa'pa' SeHlaw tI'chu' 'e' nab...'ach ruchpa' Hegh.
pat nuD jomta'bogh malja'.
SeHwI' Qatlh yajbe'mo' pat tI'laHbe'.
wa' Hogh ret SeHlaw Duy' vIjomHa'.
vavwI' SeHwI' Qatlh vIrarHa'nISmo' jI'IQ.
leQmey nap vIQotlh.
muboQ cha' latlhpu'.
qach wutlhDaq SIrghmey Daq choH wa'.
Hat SeHlaw motlh je' latlh 'ej ghunmeH mIw wIv.
SeHlaw qa'meH wIjom.
DaH Qapchu' muD Hat leHwI' pat.
DaH jIH mutlho' chIrgh yej.
vanvam vISIQ.
-- ghunchu'wI'
_______________________________________________
Tlhingan-hol mailing list
[email protected]
http://stodi.digitalkingdom.org/mailman/listinfo/tlhingan-hol