tlhIngan-Hol Archive: Wed Jan 19 09:03:03 2011
[Date Prev][Date Next][Thread Prev][Thread Next]
qoqqoqmey - jaj wa'maH wa'
- From: "ghunchu'wI' 'utlh" <[email protected]>
- Subject: qoqqoqmey - jaj wa'maH wa'
- Date: Wed, 19 Jan 2011 12:00:05 -0500
DaHjaj chenmoHwI' Dotlh DIQoy.
QIt chen qoq chu'.
baS meyrI' neH 'oH.
qech neH bIH rutlh'e'.
qech neH 'oH DeS'e'.
'ach lI'laH qechmey.
DeS rutlh je lutu'lu' net ghetlaH.
'ay' tu'lu'be'bogh wIghunlaH.
qoqHom vIDelta''a'?
QujtaHvIS, qoqHom qeng qoq.
DortaHvIS Quj, che'ron tutDaq lan qoq 'ej tut toS qoqHom.
pe''egh tut yor SIchbogh qoqHom wa'DIch.
qoqHom lu'oghlI' cha' ghojwI'pu'.
qoq 'ul pat lunablI' nuv puS.
qoq SoSbor lunablI' nuv vIboQbogh.
SeHlaw wInabchoH.
ruQmeH ret'aqmey leQmey je ngaS.
ret'aq yuvchugh ruQwI', 'etDaq vIH qoq.
ret'aq yuvHa'chugh ruQwI', 'emDaq vIH qoq.
ret'aq tlhe'chugh ruQwI', DIng qoq.
ghunwI'vaD SeHmeH mIw vIDel.
DeS Do neH wISeHlaH.
rut DeS tajvaj'e' wISeH wIneH.
Do' DeS tajvaj wIjuvlaH.
pImchugh tajvaj wIneHbogh tajvaj wIjuvbogh je, DeS nguSDI' wIrIH.
'ach napbe' tovam.
lughDI' tajvaj nguSDI' wIrIHHa', 'ach vIHtaHmo' DeS QIt mev.
DoSDaq mevbe'.
lughpa' tajvaj nguSDI' wIrIHHa'chugh, pIj DoS SIchbe'.
vaj HoptaHvIS DeS, nom vIHmoHlu', 'ej SumtaHvIS DeS, QIt vIHmoHlu'.
pupbe' tovam. rut choltaHvIS mev, yapbe'mo' nguSDI' HoS.
'ach HoS wIghurchugh, pIj DoS juS mevpa'.
vaj to chu' wIchelnIS.
cholbe'choHchugh DeS, HoS ghurlu'.
ngajchugh poH, loQ HoS lISlu', 'ej nI'chugh poH, pe'vIl HoS lISlu'.
Qap tovam.
rut DoS juSchoH DeS, 'ach SIbI' lugh'eghmoH.
juSbe' wIpoQqu'chugh, latlh to wIchellaH 'ej DeS Do wIvuSlaH, 'ach 'utqu'be'.
wa'leS leghbogh noch wIghunchoH.
-- ghunchu'wI'