tlhIngan-Hol Archive: Mon Jan 17 23:23:28 2011
[Date Prev][Date Next][Thread Prev][Thread Next]
qoqqoqmey - jaj chorgh
- From: "ghunchu'wI' 'utlh" <[email protected]>
- Subject: qoqqoqmey - jaj chorgh
- Date: Tue, 18 Jan 2011 02:19:59 -0500
DaHjaj Qapchu' qoq ngo'.
Qap Hoch nguSDI'. Qap nguSDI' SeHwI'mey.
Qap muD yuvmoHwI'. Qap muD SeHwI'.
Qap rutlhmey. loQ Hab 'ach Qap.
Qap mIrmey. QeyHa'qu' 'ach Qap.
Qap volchaH HoS QaymoHwI'.
Qap volchaH noch.
Qap SoSbor, ghunmeH De'wI' je.
Qap Qumpat. Qap SeHlaw.
Qap je ghunbogh ghojwI'. :)
vaj ravDaq qoq wIlan.
let rav 'ej Habqu'.
Qapmo' Hoch qoq 'ay', Qap qoq naQ 'e' wIpIH.
mamujbe'. qoq SeHchoH DeghwI'qoq.
qoq DeS SeHchoH yaqoq.
nom vIH qoq.
qoq chu' pachmey nablI' latlh ghom.
ngongmeH pach pat chenmoH.
loQ Qap 'ach QIv.
latlh pat chenmoH.
cha'DIch QaQ law' wa'DIch QaQ puS 'ach vaQbe'.
nIv ngongmeH pat wejDIch.
pu'jIn ghItlhchoH ghom.
qech nID ghunwI'. SeH'egh qoq neHtaH.
ghaH vIqeS 'ej SeH'eghmeH mIw vIDel.
Qapbe' mIw wInIDbogh.
ghew chochmeH nuH vI'agh.
nom Seng wItu' 'ej mIw wIlughmoH.
SIbI' Qap ghojwI' qech.
vang qoq 'ej wa'logh DIng. DIngpu'DI' mev. pup.
qoq QoghIj yajba' ghunbogh ghojwI'. jIQuch.
wa'leS maleS.
-- ghunchu'wI'