tlhIngan-Hol Archive: Tue Jan 11 02:56:28 2011
[Date Prev][Date Next][Thread Prev][Thread Next]
SIS
- From: R Fenwick <[email protected]>
- Subject: SIS
- Date: Tue, 11 Jan 2011 20:54:20 +1000
- Importance: Normal
naDev SISqu'bejtaHqu'.
Australia veng Brisbane vIDab jIH. qaStaHvIS Hoghmey law', Sepvam tIng
chanDaq SIStaH. rut SISbe'choH 'ach reH SISqa'law'taH 'ej tugh.
SISqu'taHmo' SoDchoH. chaq De'vam lISov De' chu' muchraj. latlh vengDaq
SoDqu' naDev SoDtaHvIS neH - bIQmo' Heghpu' wa'maH wa' nuv DaHjaj ram net
ja', 'ach vengvamDaq Heghpu' pagh - 'ach naDev Qoblaw' SoDtaHghach.
1974'e' naDev SoDpu' je. maHvaD Qat wanI'vetlh. ngugh yIQqu'choHpu' 6500
juHmey 'ej 15.5 'uj 'ab bIQtIqmaj bIQ. DaH yIQqu'choH 9000 juHmey net Har
'ej bIQ woch law' cha'maH Soch ben bIQ woch puS net Har je.
juHwIj'e' 'elbe'law' bIQ 'ej ghaytan jIHvaD qorDu'wIjvaD je qay'choHbe'.
'ach vengmajvaD qay'qu'ba'. Sep Hoch QIH tI'lu'meH, wa'netlh 'uy' DeQmey
luDIlnISlu' net SIm. chaq naDev SoDchu'be' 'ach naDev mayIQ.
1908 bom qonta' Dorothea Mackellar, 'ej Hatlhmaj DelmeH ghaH, jatlh:
meQlu'bogh Hatlh vImuSHa', ("I love a sunburnt country,
Deb beQqu' ghaj Hatlh qoD; a land of sweeping plains;
ghegh HuDmeyDaj 'ej vIlbej; of ragged mountain ranges;
rut QaD, rut SIS, rut SoD. of drought and flooding rains.")
(HatlhwIj ("My Country"), 1908)
teHbejqu'taH <QaD, SIS, SoD>...
QeS 'utlh