De' wa': SoSnI'wI'

[Alan Anderson <aranders@insightbb.com>]

Hegh SoSnI'wI'.

ma'IQbe'.  ghaHvaD maQuch.  Heghruppu'.  Heghqangpu'.  qaStaHvIS  
cha'maH DIS yInchu'be'.  Hegh loS neH.

qaStaHvIS yInDaj HochHom Somraw' 'oy' SIQ.  reH mon 'ej reH Quchlaw'  
'ach reH 'oy'bej.  bepbe'.  bechbe'; SIQlaH 'e' nom ghoj.  DaH  
SIQnISbe'.

chorgh ben Heghpu' loDnalDaj, vavnI'wI'.  pIj SoSnI'wI' Such  
tuqnIghpu', 'ej juHDaj Dab rachwI', 'ach mob.  DaH mobnISbe'.

Heghpu' vavwI' vav SoS je.  Heghpu' SoSwI' vav SoS je.  Heghpu'  
be'nalwI' vav vav SoS je.  Heghpu' ba'nalwI' SoS vav SoS je.  ngablI'  
no'wI', 'ach vIqawtaHvIS lojlaHbe'.

-- ghunchu'wI'