tlhIngan-Hol Archive: Mon Jul 21 20:35:53 2003
[Date Prev][Date Next][Thread Prev][Thread Next]
tagha' 'orwI' jIH
- From: "d'Armond Speers" <[email protected]>
- Subject: tagha' 'orwI' jIH
- Date: Mon, 21 Jul 2003 19:31:45 -0600
tagha' 'orwI' jIH.
wa'Hu' vIchovlu'. chorghlogh Qoylu'pu'DI' 'orwI' DuSaQ vIpaw. chovwI'
vIqIH. vaghmaH vaHben bogh 'e' vIloy. be' mach ghaH. wa'maH chorghben
boghDI' 'orwI' moj. qaStaHvIS wejmaH Soch DIS 'or. Dojqu'!
muchovmeH wej 'ay' vISIQnIS. 'ay' wa'DIch vIDel. leng Hop vInabpu', 'ej
lengwIj vIQIjnIS. cha'vatlh SochmaH cha' qelI'qam 'aD leng. muD, Hat, ghor
je vIqelnIS. (Sumqu'mo' HuD ghor vIqelnIS). leng vIQIjchu'DI', rIn 'ay'
wa'.
tagh 'ay' cha'. SovwIj tob chovwI'. Hoch qel. qaStaHvIS wa' rep muchov.
Duj pat vIyajnIS; QummeH mIw vIlo'nISchu'; chach mIw vIQIjnIS; qum chut
vIpabnIS. (mughel <ghorgh yInSIp lo'nIS 'orwI'?> jIjang <DaH vIpoQlaw'!>
Hagh.)
veb 'ay' wej. jIQapmeH Duj vI'orchu'. 'eqmo' jotqu' SuS; ngeD Duj vI'ormeH
Qu'. leng vInabbogh wIghoSchoH. Daq vIcholDI' chuq vIjuv, 'ej Do vInoH.
qaSDI' wa'maH vagh tup leng wIqIl 'ej latlh vergh vISamnIS. ngeD vISammeH
mIw. chach mIw wIqeq. (meQchoHchugh tel chay' bIvang? QapHa'chugh Qum pat
chay' vergh DaghoS? chu'Ha' jonta' nuqDaq bISaq?) yonDI' chovwI' vergh
wIghoS, SaqmeH mIw vI'aghmeH. (runchugh SaqmeH He; tunchugh SaqmeH He;
Huvbe'chugh SaqmeH mIw; 'ej Saqchu'meH mIw). tagha' rIn ghu'; qaStaHvIS
cha' rep muchov.
tIjHa'DI' chovwI', muHoy'. jIQapchu'! (Qatlh mIwvam; wa'logh jIQaghchugh
jIQapbe'. ngoDvammo' motlh bIt ghojmoHwI').
DaH 'orwI'na' jIH. 'ej raQpo' vIqenglaH.
--Holtej
SKI: Holtej passed his private pilot check ride.
_________________________________________________________________
Add photos to your e-mail with MSN 8. Get 2 months FREE*.
http://join.msn.com/?page=features/featuredemail