tlhIngan-Hol Archive: Thu Apr 18 14:37:10 2002
[Date Prev][Date Next][Thread Prev][Thread Next]
DaHjaj lut
wa'wen bong Seng be'nalwI' puqloD. *merIy* ghaH be'nalwI''e'. *berayan* ghaH
puqloDDaj'e'.
berayanvaD puHDujDaj ngo' nobpu' be'nalwI'. jatlh chutnav le' <<merIy
puHDuj 'oH puHDujvam'e'>>. berayan wIra'. majatlh <<yaSvaD chutnavvam yInob.
tamnIS. jatlhnIS chutnav chu' <berayan puHDuj 'oH puHDujvam'e'.>>> puHDuj
chutnav je tlhap. Qochbe'. majatlh <<SIBI' *Insurance* DaSuqnIS.>> Qochbe'.
loD ghaHmo' 'ej Qupmo' waghqu' *Insurance*. mIpHa' berayan. *Pizza Hut*Daq vum.
chutnav wInobpu'bogh choHmoHchugh berayan, *Insurance* Suqta'be'chugh vaghvatlh
DeQ DIlnIS berayan. Huch polmeH SuDqangchoH. chutnav ngo' pol. choHmoHbe'.
*Insurance* Suqbe'.
ghIq latlh tlha'taHvIS berayan, tlhoy SumtaH. nom mev latlh. QIt mev berayan.
paw'. qay'choHchu' ghu'. SuDpu'. luj.
DaHjaj po noHwI' qIHnIS berayan. [DIvI' Hol jatlhDI', jatlh Humanpu' <<noHwI'
tlhopDaq narghnIS berayan.>> taQ Human QIch. narghnISbe'ba'. yItnIS neH.]
DaHjaj po puHDujwIj 'el jIH, merIy, berayan je. QuQ leQ vItlhe'moH. QuQ
chu'be'. tamchu' QuQ. chu'taH wovmoHwI'mey leQ 'e' vIlegh. Heghchu'pu' 'ul
polwI'. puHDujwIj lo'pu' merIy. rInDI', wovmoHwI'mey chu'Ha'be'pu' merIy.
jIQeHchoHbe'. qaSDI' ghu'vam lI'be' QeH. Dub'eghmeH QeHwIj poQbe' merIy. Qagh
neH. DaH ghu' wItI' neH. qay'be'.
Do' cha' puHDuj vIghaj. Heghpu' *Honda Civic Hatchback* Doqqu'; Human be' wuS
rur. QaptaH *Honda Insight*. Doqbe'; baS rur. Civic QapchoHmoHmeH Insight 'ul
vIlo'.
nom vIvum 'ej Do' mapaSchoHbe'. Do' berayan jup Da noHwI'. Do'ba' berayan.
puHDuj'e' ngeQpu'bogh berayan DIlnIS berayan. tlhoy Sumpu'mo' wejmaH DeQ *fine*
DIlnIS 'ej *cost of court*mo' javmaH DeQ DIlnIS. roD *Insurance* Hutlhmo'
cha'vatlh vaghmaH DeQ DIlnIS je 'ach *fee*vam poQHa' noHwI'.
jatlhDI' Humanpu', jatlh <<*fee*vam chagh noHwI'.>> noHwI' vIbejchu' 'ej pagh
chagh. taQbej Human QIch.
marInDI' *Civic*Daq machegh. tlhoS QuQ vIchu' 'ach 'ul yap Hutlh 'ul polwI'.
wej HujchoHchu'. juHwIj wIghoSmeH mayItchoHlI'. juHDaq mapawDI' Insight wIlo'
jIH merIy je. cha' nuv neH ngaSlaH Insight. cha' quS neH ghaj. juHDaj ghoS
berayan. Civic wIghoSmeH Insight wIlo'.
Insight 'ul wIlo'qa'. QIt motlhchoH jajwIj.
pItlh
charghwI'