tlhIngan-Hol Archive: Wed Nov 21 20:54:58 2001
[Date Prev][Date Next][Thread Prev][Thread Next]
lut 'ay' wa': rInpu'DI' may'
- From: Qov <[email protected]>
- Subject: lut 'ay' wa': rInpu'DI' may'
- Date: Wed, 21 Nov 2001 17:38:00 -0800
I accidentally wrote this while trying to concoct verb prefix examples for
Beginners' Corner. And Lawrence wonders why I never get anything done.
--------------
yuQ machDaq luDan romuluSngan QaS tlhIngan QaS je. jo luSeH luneHmo'
qaStaHvIS cha' DIS vaylI'. toq yuQ, 'ach 'Itlhbe'mo' nganpu' toplIn
tlhIlbe'. Soj SuqmeH, Sung Du'mey weH negh, 'ach roD roghvaH lubuSHa' novpu'.
rIn wa' may'. DaHjaj Qaplaw'ta' romuluSnganpu'. che'ronvo' yIt tlhIngan
loD rIQ. Doy'qu'. jolmeH QuvDaq yItlaHpa' leSnIS. qachHom lutu'DI'
'el. qachHomDaq Sung be' mer. qulDaj retlhDaq joDtaH Sung. Soj
vutlaw'. lojmIt waQmo' tlhIngan, Haw'laHbe'. tlhIngan bej.
ghu' qel tlhIngan. nIteb Sung HoHlaHba', 'ach 'oy' Hoch
SomrawDaj. 'utbe'chugh vangqangbe' SuvwI'. be' ghIj qabDaj 'e' loS tlhIngan.
tlhIngan Hol Hoj jatlhchoH Sung. jatlh <choHoH'a'?.>
tlhIngan mer SoQDaj. jot ghogh 'ej tlhIbHa' Hol. qoy'be'. jatlh SuvwI'
<choboQbe'chugh vaj bIHegh.> buQ 'e' Hech 'ach Doy'qu'mo' gheghHa' ghoghDaj.
mu'tlhegh qel be'. mISlaw'. jatlh <qaboQchugh vaj choHoHbe''a'?>
jach SuvwI' <baQa'! maSutlhbe' jay'> jatlh. <chaq qaHoH, chaq qaHoHbe'.>
Sung lughIjbe'law' mu'mey. <De' 'oHbe'. bI'elDI' choHoH pagh choHoHbe'
'e' vISov.> jatlh. 'unvo' yuvtlhe' pep 'ej Soj nuD. Soj larghlaHmo'
tlhIngan tlhoS QublaHbe'. <bIghung'a'?> jatlh be'. <jISoprup.>
ngugh be' HoH neHchoH tlhIngan. nuQ. ghungqu' tlhIngan 'a be' QIp
tlhochnIS. <jIghungbe'> jatlh.
<jIghung jIH> jatlh be'. qul DopDaq 'un nechmoH. 'un bIS'ubDaq ngawDeqDaj
tey. ghaH retlhvo' jengva' Suq. 'unvo' jengva' tebchoH. buy'chu'DI'
jengva', 'unDaq yuvtlhe' lanqa' 'ej quSHomDaq ba'choH. qIvDu'DajDaq
jengva' lan. jatlh <chaq SoHvaD 'eybe' Sojmaj, 'ach DaSopchugh DuHoSmoH>.
<HughlIj vISIjchugh ghaytan Soj 'eymoH 'IwlIj> jatlh tlhIngan. HoHmeH yap
HoSDaj. taj lelchoH, be' ghoStaHvIS.
HughDaj So'meH be' wa' ghop lo'. <lIHoHta'DI' lISop'a' romuluSngan?>
HoSDaj natlh mu'mey. jaghchaj Sop'a' romuluSngan? Sovbe' tlhIngan 'ach
SomrawDu' pujmoH qech. taj chagh. Dejbe'meH QIt torchoH. puj 'e'
leghlaHmo' be' QeHqu' tlhIngan, 'ach SomrawDaj ra'meH yab, tlhoy Doy'
yab. ratlhbogh HoS natlh QeH. tor 'ej tlhuH neH.
qIvDu'Dajvo' tlhIngan qIvDu'Daq jengva' ngop Qay be'. vangbe'
tlhIngan. tlhIngan poghmey pe'lu'chu'bogh legh be'. Dat lam 'Iw je
tu'lu'. romuluSngan 'Iw 'oHbe'. poS ghopDaq tlhoS cha' nItlhDu'
luchevlu'. nIH ghop ngejlu'law'. <yIleS> jatlh be'. <qaQorgh>.
be' nItlhDu'Daq Soj woH. tlhIngan nujDaq Soj lan. tuHchu' tlhIngan. ghaH
nuS chay' 'e' ngIl be'vam? <jIHoSqa'DI', ghaH vIHoHta'DI' jIHoH'eghnIS >
ja''egh.
yIvchoH tlhIngan. ngugh Soj 'ey law' bortaS 'ey puS.
vulchoH tlhIngan 'ej Dej. ravDaq chuS nuHmeyDaj SutDaj je 'ach vemmoHbe'.
------
SKI: Injured Klingon is too tired to resist shameful assistance from
primitive native.