tlhIngan-Hol Archive: Fri Jun 22 12:25:19 2001
[Date Prev][Date Next][Thread Prev][Thread Next]
jIQIj
- From: Will Martin <[email protected]>
- Subject: jIQIj
- Date: Fri, 22 Jun 2001 12:23:33 -0400
wa'wen mamI'choHDI' be' vIqIH. *QIyna'* rur pongDaj 'ach pongna'Daj
jatlhlaHbe' tlhIngan ghogh. pongvam tagh mu' 'ay' *tr*, vaj *Q* vIlo'.
mamI'taHvIS QIyna' vItIv 'ach muDuQbe'. mI'wI'pu' law' vItIv. mevDI' QoQ,
pe'vIl mu'uchchoH QIyna'. nom moq tIqDaj. ngoDvam vISov pe'vIl rowIj moqmo'
tIqDaj. DaH muDuQchoH be'vam. parmaqqay vIrurlaw'. jIHe'choHlaw'. jISumDI'
monchoH be'pu'. mutha'choH be'pu' qan. tlhaQchoH ghu'.
juHwIj vIghoSpu'DI' QIyna' vIrI'. ghogh HablI' vIlo'. qaStaHvIS cha' rep
maja'chuq. QaQqu'law' wanI'. latlh jaj vIrI'qa'. qaStaHvIS latlh cha' rep,
maja'chuq. QaQqu'law'taH ghu'. ngoD chu' mujatlh.
qaStaHvIS cha' Hogh pIq lenglI' QIyna'. *New Mexico*Daq vavDaj Such.
lengvam taghDI' *vengHomSuD*Daq mI' 'e' nab QIyna'.
Daj. vIja' <<vengHomSuD vIghoSlaH 'ej mamI'laH.>>
tamchoH QIyna'. tamchoHchu'. Hegh 'e' vISIvchoH.
jIjatlh <<qaSuch DaneHbe'chugh qaSuchnISbe'. bItlhab 'e' yItIv.>>
mujang. jatlh <<ghobe'! ghobe'! jItlheDpa' muSuch Hoch'e' vIneH!>>
jIQub. jIja'egh <<Hoch'e'? Hoch'e'? jIH vISov, 'ach latlh 'Iv?>>
QIyna' vItlhob. jIjatlh <<latlh bangHey Daghaj'a'?>>
tam QIyna'. QIt jatlhchoH. tlhoS tlhup. jatlh <<chaq cha' tu'lu'. chaq
wej...>>
muDuQHa'choH QIyna'. jupna' mojlaH 'ach pay' bang mojlaHbe'ba'.
qay'be'. nIteb jIQuchlaHtaH.
ngoDvam vItu'pa', latlh wanI'vaD jIjeS 'e' vInab. QIyna' vISuch 'ej mamI'
'e' vIHech 'ach DaH loQ DajHa'choH QIyna', 'ach mamI'bej latlhpu' jIH je.
wanI'vam vItIvqu'.
javHu' *qatlhIy* vIghom. (qatlhIy rur DIvI' pongDaj 'ach jatlhlaHchu'be'
tlhIngan ghogh.) mamI'. vItIv. mI'DI' qatlhIy, po'qu', 'ej pe'vIl bejtaH
mInDu'Daj.
mamI'chu'. marInDI' jInongbej. jIjatlh <<qaSov vIneH. chotlhej DaneH'a'?>>
mujang. pe'vIl jatlh <<HIja'. reH mamI'taHmeH qoch vIneH.>>
'ul rur qa'Daj. muveghchu'.
DaHjaj ram mamI'qa'. wa'leS mamI'qa'. cha'leS mamI'qa'. jIQuchchu'.
charghwI' 'utlh