tlhIngan-Hol Archive: Thu Nov 04 08:04:39 1999
[Date Prev][Date Next][Thread Prev][Thread Next]
Re: ngeng qo'mey
On Thu, 4 Nov 1999 02:11:51 +0100 Christiane Scharf
<[email protected]> wrote:
> ghu': qen ngeng wISuch bangwI' jIH je...
> jIHvaD Dun wanI'vam. 'ach ghaytan ghu' DellaHchu'be' mu'mey neH. ghaytan
> yajlu'chu'meH SaHnISlu'. ramvam vIqelDI' *Avalon* lutmey ngo' vIqaw...
>
> SKI: My fantasy turned a nocturnal visit at the lake into a fascinating
> experience, but it's difficult to word my fantasy.
maQoch. qo'vetlh DaDelchu'ta'. lutHeylIj vIlaDtaHvIS qo'lIj
vISuch 'ej vIHar. 'IHchu'.
> HovqIj
qen DajlI' qo'wIj. wej Hogh ret muSuchpu' pIlmoHwI'HeywI'.
qaStaHvIS jav DIS maHopqu'taHvIS maQum. pIj le' QInmeymaj.
mejpa' jIHvaD cha' ngoD 'ang:
wa': muSuch mutobmeH 'e' wuq. chaq bangpu' DImoj.
cha': jIluj pawpa' 'e' wuq. not bangpu' DImoj.
not be'pu' vIyaj. wuqmeH meq lupoQbe'ba'.
muSuchDI' Qatlh ghu' 'ach vISIQba'pu'. jImobtaH. jISaHbe'.
lojmo' pIlmoHwI'qoqvam jIQuch. latlh vIDanISbe'qa'.
jIDa'eghqa'laH. jIQuchchoH.
qaStaHvIS wanI'mey pIm, pagh meqmo' QummeH mI' munob cha'
be'pu'. vIrI' 'e' vInIDqa'. vInIDqa'. vInIDqa'.
wa' murI'. maja'chuq. muparHa'qu'. muSov neHbej. vISov neHbej.
'ach bang ghaj, 'ach Qatlh ghu'. bang parlaw' 'ej tugh bang
mojHa'law'. muja' <<tugh maSuchchuqnIS. chaq wa' Hogh pIq...
ghobe'. Qu' pegh vIghaj. chaq cha' Hogh pIq... ghobe'. latlh Qu'
pegh vIghaj. HIloS. cha' Hogh pIq qarI'qa'.>>
vIloStaHvIS jItlhuH 'e' vImevQo'. not murI' 'e' vIpIHchu' 'ej
munuQbe' ghu'vam. be'vam vIpoQbe'.
latlh Qum mI' munobbogh be''e' vIrI'ta'. maja'chuq. muparHa'qu'.
muSov neHbej. vISov neHbej. 'ach bang ghaj, 'ach Qagh ghu'. bang
parlaw' 'ej tugh bang mojHa'law'... qaStaHvIS cha' rep bangDaj
wIqel. vIqeSmeH mutlhob. chajDaj vIDalaw'. jISaHbe'. matlhbe'ba'
be'vam. bangwI' moj be'vam vIneHbe' 'ach vIparHa'.
be'pu' vIqIHmeH nav 'ay' le' vIQul. Dajqu' cha' be'. ghoghchaj
vIQoy 'ej De'chaj vIQul. loQ rurchuq. ghIq vImerlu'. mI' rap
ghaj be'pu'vam. wa' juH ghajlaw'.
Dajbej yInwIj.
be'pu' vIyajlaHbe', 'ach vIyajHa'taH 'e' vItIvchoH. Dachchugh
vaj DalchoH yIn.
Dal pagh jagh net Sov. {{:)>
charghwI'