tlhIngan-Hol Archive: Tue Jul 06 14:08:47 1999
[Date Prev][Date Next][Thread Prev][Thread Next]
nuHIv muD
- From: "Andeen, Eric" <[email protected]>
- Subject: nuHIv muD
- Date: Tue, 6 Jul 1999 14:09:35 -0700
wa'Hu' vengwIjDaq Dajqu' muD Dotlh. tujqu' vengwIj, *USA* HochHom je net
Sov. wa'vatlh wa'maH wej *Farenheit* wISIQnIS, 'ach qay'be'. motlh Hatvam.
tujbej, 'ach wISIQlaH.
wejlogh Qoylu'pu'DI', Dujmaj wISuqqa'meH jIH be'nalwI' je, Duj Suy wIghoS
(ghorlu'pu'be'; leH motlh neH poQ). Hujlaw' HuDmey Hop; bIH DungDaq loQ
SuDbe'choH chal. Dujmaj wIloStaHvIS, Dujmey chu' wInuD. paw Dujmaj, 'ej
mamejrupchoH. mamejnISbej tugh 'e' wItlhoj. nuchol SuS HoS. DujDaj yong
be'nalwI' 'ej DujwIj vIyong jIH. mamej.
wej qelI'qam vIlengpa', lam tebchu' muD. wa' qelI'qam neH 'ab chuq'e'
vIleghlaHbogh. tI DI, veQ je puvmoH je SuS. *West* He SochDIch vIghoSDI',
Qapbe'lI' Dujmey SeHmeH wovwI' 'e' vItu'. Do' *West* He SochDIch,
*Camelback* He je botlhDaq QamlI' Hung yaS 'ej Dujmey ra'lI'. ghopDaj lo':
<mev! mev! mev!>; <tlhe'! tlhe'! tlhe'!>; <ruch! ruch! ru-u-u-u-u-uch!>;
<mev! mev! mev!>.
juHwIjDaq jIpaw, 'ej jevtaH 'e' wIbej jIH, be'nalwI', Sajmaj je. qaStaHvIS
wej tup loQ SIS, 'ach motlh tuj neH 'ej lam neH SuS.
jevpu'DI', tlheDchoHDI' juHHov, mayIt (Dutlhejbe' Sajmaj). 'IHchu' chal.
juHHovvo' 'engmey DuQ tIHmey wov. SuDqu' 'ej wovqu' chal. mayIt. ghIrpu'DI'
juHHov, DoqchoH chal 'ej meQlaw' 'engmey. juHHov ghIrmeH DaqDaq, wovqu' chal
'ej qu'bogh qul chu' rur. tlhoS Heghpu'bogh qul rur latlh chal mIchmey.
muD Dotlhvam luDelmeH, puplaw' Qugh HoD mu'mey: tlhuHmoH, qar'a'?
pagh