tlhIngan-Hol Archive: Wed Sep 23 19:28:54 1998
[Date Prev][Date Next][Thread Prev][Thread Next]
QoQ lIngqa'wI'
- From: "William H. Martin" <[email protected]>
- Subject: QoQ lIngqa'wI'
- Date: Wed, 23 Sep 1998 22:29:39 -0400 (Eastern Daylight Time)
- Priority: NORMAL
DaHjaj cha' QoQ lIngqa'wI' vIje'. Hoch teSwIj toy' Hoch QoQ
lingqa'wI'.
janmeyvamvaD mu'na' wIghajbe' vaj vIDel.
vogh QoQ muchlu'. QoQvam qonlu'. 'elpI'Hom bochDaq QoQ De'
qonlu'. 'elpI'Homvam boch vIje'. juHwIjDaq jan qoDDaq
'elpI'Homvam boch vIlan. nIHDaq janvam Doch je rar baS tlhegh.
poSDaq janvam latlh je rar baS tlhegh. 'elpI'Hom bochvo' QoQvam
lIngqa' Dochmeyvam. DochmeyvamvaD <<QoQ lIngqa'wI'mey>> vIpong.
Suyaj'a'?
cha'ben cha' QoQ lIngqa'wI' vIje'. qaStaHvIS wa' jar janmeyvam
vItIvqu'. qaStaHvIS wa' jar Qapchu' janmeyvam 'e' lay' Suy. jaj
veb loQ muchHa'choH wa' QoQ lIngqa'wI'. QoQ much, 'ach <<yu bIm
'egh loS vagh jav Soch chorgh ju>> bomDI' leSpal, loQ chuS
<<bIm>>. latlhmey muchchu', 'ach loQ chuSbej <<bIm>>. jImogh
'ach jISIQ. qaStaHvIS cha' DIS jISIQ.
DaHjaj cha' latlh vIje'. qutlh. Qapchu'. mach. vItIv. vImaS. DaH
QoQ vItIvchu'. nIHDaq jan chuS vISIQnISbe'.
QaQ yIn.
charghwI' 'utlh