tlhIngan-Hol Archive: Wed Oct 07 19:18:10 1998
[Date Prev][Date Next][Thread Prev][Thread Next]
DujwIj nuDlu'
- From: "Andeen, Eric" <[email protected]>
- Subject: DujwIj nuDlu'
- Date: Wed, 7 Oct 1998 19:15:09 -0700
wa'maHHu' DujwIj nuDlu'. mIwvam lupoQ SepwIj chutmey.
Do' yaHwIjDaq Sum nuDwI' qach. pa' vIghoS 'ej loQ jIloS. rut loSqu'nIS
SIQwI'pu', 'ach Do' cha' Duj neH lunuDlu'taHvIS jIloSnIS. nuDwI' luch
botlhDaq DujwIj vIvergh 'ej vIyongHa'. DujwIj nuDlu'taHvIS, pa'HomDaq
jIloS.
DujwIj 'o' taQbang yIbDaq noch lan vumwI'. DujwIj yong latlh vumwI'. QuQ
chu' ghaH 'ej chung, 'ach nuDmeH luchmo' vIHbe'taH DujwIj. qaStaHvIS
cha' tup QuQ chu'taH vumwI' 'ej taQbang SIpmey juvtaH yIb noch.
qaSpu'DI' cha' tup, chungHa' vumwI' 'ej leS QuQ 'e' chaw'. qaStaHvIS wa'
tup leStaH QuQ 'ej taQbang SIpmey juvtaH noch. mIw naQ jIH 'ej qon
De'wI'.
DujwIj taQbangDaq *hydrocarbons*, *carbon monoxide* je juvlu'. Duj
taQbang SIpmeyvam vuS chutmey, 'ej Do'Ha' DujwIj *CO* law' law',
*CO*-'e' chaw'bogh chutmey law' puS. lujpu' DujwIj. va.
cha'Hu' ram Duj SuyDaq DujwIj vIqeng. wa'Hu' nuD chamwI' 'ej murI'.
mujatlh <janmey puS wIlISta', 'ej tlhoS lujbe' DujlIj. Sochlogh DujlIj
wIDaj. loSlogh Qap, 'ach wejlogh luj.> Do'Ha' lujmeH meqna' tu'lu', 'ej
wagh meqvam. mujatlhqa' chamwI' <rut QapHa' vIHtaHbogh SIp noch.>
QapHa'mo' DuDHa' nIn SIp je 'ej meQchu'be' nIn, vaj taQbangDaq law'
*CO*. taH chamwI' <ghaytan latlh vIjomnIS. Do'Ha' DaH latlh vIghajbe',
'ach tugh vIHev 'e' vIpIH>.
vaj DaHjaj DujwIj vISuqqa', 'ach vaghleS Duj SuyDaq vIqengnISqa'. DujwIj
tI'nISqa'lu'mo' 'ej waghqu'mo' vIHtaHbogh SIp nochvam jIbergh. chaq DaH
KLBC jabbI'IDmey vIjangnIS (jImon 'ej jImIghlaw').
SKI: pagh's car failed emissions.
pagh