tlhIngan-Hol Archive: Wed May 06 13:38:15 1998
[Date Prev][Date Next][Thread Prev][Thread Next]
Re: *reiki* lo' be'nal
- From: "William H. Martin" <[email protected]>
- Subject: Re: *reiki* lo' be'nal
- Date: Wed, 6 May 1998 16:38:12 -0400 (EDT)
- In-Reply-To: <[email protected]> from "Terrence Donnelly" at May 6, 98 12:16:48 pm
According to Terrence Donnelly:
>
> be'nalvaD ponglu' *Ruth*. ghojmoHwI' ghaH. *reiki* pIn'a' ghaH je.
> nuq 'oH *reiki*'e' chaq bIghel. porgh Hos yIn Hos je 'oH *reiki*'e'.
> (ghaytan *prana* *chi* je rur *reiki*.) ghopDu' lo'taHvIS, 'oy'
> rop je vormeH *reiki* SeHlaH pIn'a'. porgh HotDI' pIn'a' 'ej vIHtaHDI'
> *reiki* HoS, tujqu'law' ghopDu'Daj. 'oy'chugh nachwIj volchaHDu'wIj
> mongwIj ghap, *reiki* lo' be'nal 'ej ngab 'oy'.
choja'pa' *reiki* vIghovlaHbe'. wa'maH cha'ben jIHvaD
*japan*ngan *"modern"* Hergh lo'. not Hergh mIwvamvaD
*japan*ngan pong muja'.
nejwI' lo'. tujmeH 'ul lo' nejwI'vam. tujqu'be' 'ej HochHom
DIrwIjDaq nejwI' lanDI' jupwI', loQ tuj neH 'e' vInoH.
jIropchugh qoj jIrIQchugh, *miridian* tlhegh Sam. SamDI' DIrwIj
Hot nejwI' 'ej nom nejwI' vIHmoH jupwI'. DonHa'chu' *meridian*
tlhegh nejwI' He je.
HochHom DIr HottaHvIS nejwI', loQ tujbej, 'ach *meridian*
tlhegh HotDI' nejwI' tujqu'choHlaw'. meQlaw' tlheghvam. mevDI',
jIDoy'choHqu'. jIleS 'ej tugh jIpIvchoH.
jIropqu'chugh qoj jIrIQqu'chugh nejwI' lo'qa'meH jIcheghnIS.
qaSDI' wanI' cha'DIch, langchoH tlhegh 'ej nejwI' tuj law'
qaStaHvIS wanI' wa'DIch nejwI' tuj puS. ghurbe'bej nejwI'
Hatna', 'ach ghurqu' nejwI' HatHey.
wanI' wejDIch vIpoQchugh, langchoHchu' tlheghvam 'ej tlheghvam
HotDI' nejwI', 'oy'qu' tlheghvam naQ. 'ul Hotlaw' tlheghvam.
qul mojlaw' tlheghvam. 'oy'chu'. nejwI' HoS law' 'oy'naQ HoS
puS.
jIDoy'qa' 'ej jIpIvchoH. Dajqu'. Dojqu'. Sarqu' Hergh mIwmey.
> 'oy'qu' be'nal Sos porgh. ben law' *polio* SIQ ghaH. DaHjaj pujqu'
> Dub SomrawDu' 'ej SIHHa' pIpDaj. yItmeH QaHwI' (*walker*) lo' ghaH
> 'ej reH 'oy' ngabmoHmeH Hergh Sop. SoSDaj Dub DubmeH *reiki* lo'
> be'nal. SoSvaD *reiki* lo'ta'DI' be'nal, loQ HoSchoH SoS SomrawDu'
> 'ej loQ ngab 'oy'.
maj. SoSDaj QaHlaHchugh be'nallI' belbej be'nallI' 'e' vIpIH.
chaq SoSDaj 'oy'na'mo' *reiki* ghoj be'nallI'.
charghwI'