tlhIngan-Hol Archive: Sat Jan 24 05:58:36 1998
[Date Prev][Date Next][Thread Prev][Thread Next]
Quplaw'bogh jup
- From: "William H. Martin" <[email protected]>
- Subject: Quplaw'bogh jup
- Date: Sat, 24 Jan 1998 08:58:05 -0500 (Eastern Standard Time)
- Priority: NORMAL
charghwI'vo':
chorghHu' mamI'taHvIS be' vIqIHlaw' 'ach tu'chuqDI' mInDu'maj,
maghovchuqchoH. wa'maH vaghben juppu' maH. pIj mamI'.
rut loQ maja'chuq. Qupqu'law' be'vam. puq ghaH, chaq wa'maH cha'
DIS...
chorghHu' maqIHlaw' 'ach maghomqa'bej. mamI' 'ej mamonqu'. DaH
QInmey puS DIlabta' 'ej DIlI'ta'. maja'chuqmeH poH le' wIcher.
wa'maH Hutvatlh rep ghogh HablI' vIchu'. cha'maH wa'vatlh wejmaH
rep ghogh HablI' vIchu'Ha'. poHvam vItIvqu'.
maqawchuqmoH 'ej maqawchoHchu'. juppu' ngo' DIqel. wanI'mey
Daqmey je DIqel. maHagh.
mughel <qanuQ vIneHbe', 'ach ghorgh bIbogh?>
vIjang <loSmaH wejben jIboghpu'.> vIghel <ghorgh bIbogh?>
cha'maH Sochben boghpu' 'e' vIpIH. ghaHvaD QaQpu'law' DISmey.
nenchoHDI' 'IHqu'taH.
mujang <tugh loSmaHben jIboghpu'.>
mev tIqwIj. qaS vagh lup. QIt chu'qa' tIqwIj. jIjatlh <loSmaHben
tlhoS bIbogh jay'?!?!> wa'maH vaghben wa'maH cha'ben bogh 'e'
vIpIH 'ach cha'maH loSben bogh. jISImHa'qu'ba'pu'. ghaHvaD
QaQpu'bej DISmey.
wa'maH vaghben Qupqu'law'mo' be'HomHeyvam, jIyepqu'. chunlaw'.
vIQan. jIDogh.
vaj DaH jup chu' vIghaj. lutmeyDaj vItIvqu'. chaq wa'leS
mamI'qa'. ghaytan qaStaHvIS cha' Hogh maja'chuqbe'lI'. jISaHbe'.
DaHjaj bompu' tIqwIj. jIQuch. yap.
pItlh