tlhIngan-Hol Archive: Mon Dec 21 14:01:06 1998
[Date Prev][Date Next][Thread Prev][Thread Next]
De'wI' Quj <<Zelda>>
- From: "William H. Martin" <[email protected]>
- Subject: De'wI' Quj <<Zelda>>
- Date: Mon, 21 Dec 1998 17:01:04 -0500 (Eastern Standard Time)
- Priority: NORMAL
De'wI' Quj chu' Suqta' jIlwI'. vIQuj je 'e' chaw' jIlvam.
Qujvam qo'Daq loDHom jIH. Quj taghDI' pumbogh qa'Hom wov ghaj
Hoch latlh puqpu' 'ach qa'Homvam vIHutlh. qaStaHvIS loSvatlh
DIS vengHomwIj Qanta' Sor'a'. DaH nubuQ Sor'a' ghol mIgh. murI'
Sor'a'vam.
muQaHmeH puvbogh qa'Hom wov munob. muqeS qa'Homvam 'ej mughojmoH.
wej naghboch le'qu' vISamnIS. HoSghajqu'. boq luchenmoHDI'
naghbochmeyvam HoSghajchoHchu' boqvam ghajbogh nuv'e'. nuvvam
jIHchugh vaj qo'wIj vIpol. nuvvam ghaHchugh Sor'a' ghol mIgh'e',
Do'Ha'.
'etlh vISamnIS. Huch vIboSnIS. yoD vIje'nIS. peghmey vItu'nIS.
cha' naghboch vISuq 'ej naghboch wejDIch vItu' 'ach vISuqlaHpa'
jagh vISuvnIS. wejlogh jIHegh. tugh jIchegh.
Qatlhqu' jaghvam. tIn. gho rur may'pa'maj. botlhDaq
DIngtaH veH'a'. tlhoS pa' teb veHvam. DuQwI' ghaj veHvam vaj
DIngtaHvIS veH vIHotlaHbe'. murIQmoH DuQwI'. cha'maH 'uj
juch may'pa'. jav 'uj juch Hemaj. nom qet jaghwI'. mujuSchugh
jaghwI' muHotDI' jIrIQchoHqu'. tlhoS vIjuSchugh naHlet le' vIbaH
'ej qaStaHvIS cha' lup jaghvam vIroSHa'moH. qaStaHvIS cha'
lupvam wovchoH jaghwI' tlhuQ. DoSna'wIj 'oH. DoSvetlh vIqIpmeH
'etlhwIj vIlo'chugh vIHoH 'e' vIpIH, 'ach Qatlhqu' QeqmeH Qu'.
poH yap vIghajbe'. nom DIng jaghwI' 'ej muHot. jIrIQchoHqu'.
jIHegh.
tugh yay vISuq!
charghwI' 'utlh