tlhIngan-Hol Archive: Thu Dec 03 13:44:48 1998
[Date Prev][Date Next][Thread Prev][Thread Next]
wa'maHHu' qatlh jImogh?
- From: "William H. Martin" <[email protected]>
- Subject: wa'maHHu' qatlh jImogh?
- Date: Thu, 3 Dec 1998 16:43:23 -0500 (Eastern Standard Time)
- Priority: NORMAL
ghogh HablI' DIlo'taHvIS bangwI' jIH je qatlh jIQeH?
vIng bangwI'. jatlh <<bIHoptaHmo' jImogh.>>
vIQuchmoH vIneH. jIjatlh <<juHlIj vIDabchoHlaH'a'?>>
vIngtaH. jatlh <<ghobe'! mach juHwIj. buy'.>>
jInIDqa'. jIjatlh <<juHwIj DaDabchoH DaneH'a'?>>
vIngtaH. jatlh <<ghobe'! yaHwIjDaq Hop juHlIj 'ej yaHlIjDaq
jIvumchoHchugh, yaHlIjDaq Hop juHlIj. juHlIjDaq Hop Hoch yaHmey.
jIvummeH jIlengQo'! juHwIjDaq SumnIS yaHwIj!>>
jIyev. jIQub. jIjatlh <<jojmajDaq veng tu'lu'. pa' juppu' chu'
vIghaj. tugh juHmey chenmoH. yaHwIjDaq Sum juHmeyvam. chaq wa'
juH wIje'. loQ wagh 'ach Huch yap wIghaj SoH jIH je. vengvamDaq
Qu'na' DaSamchugh Sumqu'mo' yaHlIjDaq bIyItlaH.>>
SotchoH. jatlh <<Qo'! yaHwIj vIpolnIS! latlh vISamQo'! HuchwIj
DaSuqlaHbe'!>>
vIjotmoH vIneH. jIjatlh <<yIjot! HuchlIj vIneHbe'. loQ Qatlh
'ach nIteb vIje'laH. DaH yaHlIj DapollaH 'ej wa'nem latlh
DaSamlaH. jaHlIj Daparbej. pIj yaHlIjmo' bIbep. yaHlIj chu'Daq
bIyItlaH.>>
SottaH. jatlh <<Qo'! juHvam yIje'Qo'! DaH yIvangQo'. yaHlIj
yIpol. juHlIj yIpol. Huch yIvI'. 'op nem vengwIjDaq yaH chu'
DaSuqlaH jaHwIj vIpoltaHvIS 'ej juH Sum wIje'laH. tInbogh qach
ngo' wItI'laHbogh vImaS.>>
jImoghchoHlI'. jIjatlh <<chaq 'op nem juH chu' wIje'laH 'ach DaH
bIHopmo' bImogh. wejpuH. qaStaHvIS 'op DISmey bImoghlI'
DaneH'a'? 'ej tInbogh qach ngo' wItI'laHbogh vIneHbe'!
machbogh qachlIj ngo' DatI'nISbogh DamuS. juHlIjmo' reH
bIbeptaH.>>
vIngtaH. jatlh <<qatlh bIqay'?>>
jIQay'. jIjatlh <<qatlh jIqay'? qatlh jIqay? jIvIngpu''a'?
jIbeppu''a'? yImev!>>
ghogh HablI' vIchu'Ha'. jIQamchoH. SutwIj Say' ngaSwI' vIlegh...
charghwI' 'utlh