tlhIngan-Hol Archive: Fri Oct 03 22:18:26 1997
[Date Prev][Date Next][Thread Prev][Thread Next]
jupwI' chu' chotlu'pu'.
- From: "William H. Martin" <[email protected]>
- Subject: jupwI' chu' chotlu'pu'.
- Date: Sat, 4 Oct 1997 01:18:37 -0400 ()
- Priority: NORMAL
cha'maH vaghHu' jupwI' chu' vIqIH. ghaHvaD *George Moody*
ponglu'. juHwIj yI'el mura'.
juHDajDaq law'qu' Dochmey le'. Ha'DIbaH'a' tIQ Ho'Du' ghaj. nagh
mojpu' Ho'Du'vam. vInuDchu'meH ghopwIjDaq Ho'Du'vam lan juHvam.
'etlh le' ret'aq mu'uchmoH. *samurai* 'etlh 'oH. ngaSwI'
teqtaHvIS 'etlh 'angmeH, chorghvatlh ben 'etlh chenmoHlu' muja'.
tIQqu'. 'IHqu'. ghopDu'wIjDaq vI'uch jIH! bochqu'. jISeychoH.
SochmaH *samurai* 'etlh ghaj jupwI' chu'.
loS *Rome*ngan taj tIQ ghaj je. qubqu'. qo'vam naQDaq chaq
tajmeyvam rur wa'vatlh taj.
*Greece*ngan Huch tIQ ghaj je. *Greece*ngan chor tIQ ghaj je.
ghopwIjDaq vaghSaD vaghvatlh ben *Egypt*ngan nagh chor
mu'uchmoH. vIvuvqu'. vaghSaD ben latlh mu'uch je. Dochvam 'IH
law' Hoch 'IH puS. loQ tIqwIjDaq jIQom.
Dochmey 'IHqu' chenmoH jupvam je. naghmey 'IH baS 'IH je lo'.
*Tibet*ngan bombogh Duq muje' juHvam. 'ey ghoghDaj. jIHvaD
le'qu' wanI'vam. jupvam chu' vIvuvqu'.
javHu' naghmeyDaj 'IH nIHmeH taHqeq, jupvam chot qoHna'vetlh.
taHqeqvetlh jonlu', 'ach jISaHbe'. chIm bortaS. Hegh maqochwI'.
reH HeghtaH maqochwI'. not vIghomqa'laH.
charghwI'