tlhIngan-Hol Archive: Fri Apr 04 08:21:18 1997
[Date Prev][Date Next][Thread Prev][Thread Next]
HoghwIj vIDeltaH
- From: [email protected] (Alan Anderson)
- Subject: HoghwIj vIDeltaH
- Date: Fri, 4 Apr 97 10:17:28 EST
["Sunday" "Ft. Lauderdale"-Daq maHtaH]
veng SumDaq ghaHtaH SoSnI'wI' loDnI', be'nalDaj je.
megh wISoptaHvIS DItlhej 'e' manab.
Hut ben Heghpu' be'nalDaj wa'DIch; jav ben Sawqa'.
cha'logh loQ be'nalDaj chu' wIghompu' 'ach not maja'qu'chuqta'.
juHrajDaq majaH 'ej qaStaHvIS rep ba' Hoch 'ej jaw.
qallaw' SoSnI'wI' loDnI' qawHaq.
muyu' 'ej vIjang, 'ach nom lIj 'ej muyu'qa'.
<ghorgh SoSnI'lI' Dalegh? "January" qar'a'?> mutlhob.
<ghobe' "February"> jIja'.
qaS vagh tup.
<ghorgh SoSnI'lI' Dalegh? "January" qar'a'?> nutlhob.
<ghobe' "February"> wIja'.
pupHa' be'nalDaj teS.
pIj ghaHvaD majatlhqa' net poQ.
QIt jIbItchoH.
ghu' rap vISIQnIS 'e' vIHaj.
'ach QannISchoHbej Hoch.
maSopmeH Qe'Daq majaH.
chuS Qe' 'ej nuQoylaHbe' be'.
HIDjolev wIlaD 'ej nay' DIwIv 'ach mISchoHlaw' loD 'ej ra'Ha'ba'.
qaStaHvIS tup law' maja'chuq maH jabwI' je.
mIS law' DIlughmoH yonpa' Hoch.
juHrajDaq machegh 'ej majawqa'.
muyu'qa'taH SoSnI'wI' loDnI'.
reH De' nIb poQtaH.
<ghorgh SoSnI'lI' Dalegh? "January" qar'a'?> tlhob.
QIt vIja' <"February">.
vIjangqa'taH. jItuv.
mamejDI' jIH be'nalwI' je, ghu' wIqel.
chaHvaD maQuch, tay'mo' chaH 'ej Quchba' chaH.
'ach maHvaD maQuchqu', matay'mo' 'ej mapIvmo' 'ej Huvmo' yabmaj.
ramvetlh malopqu'.
"Dinner club"-Daq maSop.
maHvaD Duj verghmoH toy'wI'.
nujab nuv law'.
qaStaHvIS rep law' QoQ wI'Ij 'ej porghmaj DIvIHmoH.
"dance" cha'pu' law'.
Quchqu' be'nalwI'.
tIvba'. belbej.
Daqvam wISuchta' 'e' wInabchoHDI' Seyqu' ghaH.
paSchoH rep 'ej tugh puSchoH cha'pu'.
maratlhtaH maH cha' latlh je.
ramjep mev QoQ 'ej mejnIS Hoch.
jIQongrupqu'.
Duj verghHa'moHlu' 'ej mebqachDaq majaHqa'.
tugh jIQongchu'taH.
-- ghunchu'wI'