tlhIngan-Hol Archive: Mon May 15 07:03:29 1995
[Date Prev][Date Next][Thread Prev][Thread Next]
muchenmoH DISmey
- From: [email protected]
- Subject: muchenmoH DISmey
- Date: Mon, 15 May 1995 10:02:13 -0400
*'arubaDaq jIbogh 'e' vIghItlhta'. tlhIHvaD *'aruba qun busbogh lutHom
vIghItlhta' je. DaH jIqanchoHpu'vIS qaStaHbogh DISmey'e' busbogh lutHom
latlh vIghItlh. lutHomvetlhDaq Saja'pu' rInpa' yInwIj DIS cha'DIch *'aruba
wImej.
*qanaDa' wIghoSta' 'ej *torontoDaq juHraj wIcher. *torontoDaq bogh be'nI'wI'
wa'DIch 'a pa' wIratlhbe'. *qalgharIDaq vavwI' Qayta' ghomvaD vumbogh chaH.
vaj *qalgharIDaq qorDu'Daj tlhapta' vavwI'. HuD'a'mey QIbDaq juH wIcherqa'.
pa' bogh be'nI'wI' cha' latlh. qaSpu'DI' loS DIS neH mavIHqa'.
*HuDroyalDaq majaH (aaargh - mu'vetlh moH boyaj'a'?). bIQtIq botlhDaq 'oH
*HuDroyal'e' 'a bIQtIqHeHDaq mayIn. DIvI' Hol jatlhlu' 'a *veranSe Hol jatlh
roghvaH 'e' poQ qum. vaj *veranSe Hol vIghojta'. pa' jIyInlI'vIS qaS qo'
yupma''a'. yupma''a'Daq bIH qach'a'mey law''e' chenmoHta'bogh tera' Sepmey
pIm. pIj tayqeqmeyvetlh much vIleghmeH jIjaH. yupma''a' lutIvchu' QupwI'pu'
qanwI'pu' je.
vavwI' Qayqa'lu' - *yuStonDaq 'oHpu' juHmaj chu'. *teqSaSDaq veng tInqu' 'oH
*yuSton.
*teqSaSDaq Du''a'mey law' tu'lu' 'a *yuStonDaq bIH tu'Qo'lu'ba'. *yuStonDaq
'oH loghloHDaq vum loghtejpu' law' chamwI'pu' law' je. tera' 'ejyo'waw'
wa'DIch luSaHlI' chaH.
*vIlaDelvIya'Daq vavwI' Qayqa'lu'. naDev paQDI'norghwIj 'ut vIrInmoHta' 'ej
paQDI'norghwIj 'Itlh vIrInmoHta' je. DuSaQ 'ItlhDaq be''e' vISaw jIH vIqIH
'ej tagh yInwIj qanwI' jIHtaHvIS.
Brad