tlhIngan-Hol Archive: Mon May 30 06:30:00 1994
[Date Prev][Date Next][Thread Prev][Thread Next]
KSRP: Sonnet XXXIV
- From: [email protected] (Nick NICHOLAS)
- Subject: KSRP: Sonnet XXXIV
- Date: Tue, 31 May 94 8:26:54 EST
*wIlyam SeQpIr*. *Sonet*mey bom wejmaHloS.
qaSDI' jajlo', qatlh chIch pem 'IH chopIHmoH?
wepwIj chowoDmoHDI', lengHe vIgho'.
jIghoStaHvIS, 'engmey quvHa' choqIHmoH.
bI'IHtaH, tlhIchchaj nonDaq 'e' luSo'.
qabwIj qIp muD. DaH qabvo' QaDmeH bIQ
luSISbogh, 'engmeyvo' bIboch. yapbe'.
not Saghvam boQqoq naDqang vay'. jIrIQ
'e' tI', 'a jIwebHa'qa'meH Qapbe'.
'ej jI'IQHa'meH HerghHey noblaHbe'
Dotlh tuH. bIpay, 'a reH Doghjey vIqI'.
QoStaHvIS je DIvwI', ghaytan yaHbe'
'oy' Dun'e' SIQbogh HeS'a'Daj bechwI'.
'a qutmey bIHbej bang mInbIQlIj'e'.
wagh. 'ej ta' mIghvaD voHDajbo' luje'.
--
nIchyon.