Skip to content

Qo'noS QonoS

chovnatlh cha’maH Soch

DIS cha’SaD wej, jar wa’maH wa’


ghItlhvam HIDjolev


qay’chu’ nIn

nIn wInatlhmo’ tugh mev tayqeq wISovbogh. choHon’a’? ghum ngeb vIghum’a’?

ngoDmey tIqel.

wa’: choHbe’chugh ghu’maj, wejmaH nem loj Hoch nIn ‘e’ lumaq tejpu’.

cha’: nIn lulo’chu’meH China‘nganpu’, yapbe’ Huchchaj, ‘ach maHvaD Hoch luchenmoHmeH China‘nganpu’,
DIDIl. Huch luSuq, vaj nIn lunatlhchoH China‘nganpu’. nIn lunatlhmeH DIb lughaj je. nurur.

wej: lawchu’ China‘nganpu’. nIn natlhchoHDI’ China‘nganpu’, nom loj. chaq cha’maH nem loj.

chaq wa’maH vagh nem loj.

nIn wIQanmeH noHmaj vebHa’ wISuv. meqvam rapmo’ noHmaj veb wISuv. DaH nInvaD neH
maSuvqang. nInmo’ Iraq wISuv. nuH’a’ ghajlaw’ Iraq ‘ej meqvammo’ Iraq wISuv ‘e’ maq DevwI’ma’ HoQ,
‘ach nuH’a’ ghajbej North Korea, ‘ej nIn Hutlh, vaj North Korea wISuvqangbe’. meq ngeb ‘oH nuH’a”e’. meqna’
‘oHba’ nIn’e’.

ja’ DevwI’ma’ HoQ, «qay’be’. bIQSIp wIlo’choH. Fuel Cell DI’ItlhmoH. *nucular* nIn wIlo’. pemHov tIH
wIlo’. pumtaHmo’ bIQ, HoSvam wIlo’. vIHtaHmo’ SuS, HoSvam wIlo’.»

Fuel cell Hap waghmo’, wa’ fuel cell puHDuj wagh law’ vagh puHDuj motlh wagh puS. qay’be’ chenmoHghach.
qay’ Hap. Hap yap Hutlh qo’.

Dat bIQSIp net Sov, ‘ach watlhbe’. bIQSIp wIlo’meH watlhnIS. Qatlh watlhmoHmeH Qu’. nIn
poQ Qu’vam, ‘ach nIn wIHutlhchugh, bIQSIp wIwatlhmoHlaHbe’.

nIn motlh qa’meH ‘oHbe’ *nucular* nIn’e’. lamchu’. HoS tarvam. wa’ woj choHwI’ chenmoHlu’meH,
wa’maH DIS poQlu’ ‘ej nIn law’ poQlu’. wejmaH DIS taH, ghIq woj choHwI’ natlhlu’chu’.
QaplaHtaHbe’. Qaw”egh ghIq tar moj puH. ‘ul neH lIng. nIn latlh lo’mey DIpoQ.

QIt HoS lIng SuS, pumbogh bIQ, pemHov tIH je. HoS wInatlh ‘e’ wIghurHa’moHbe’chugh,
yapbe’ HoS Halmeyvam.

tlhoy nIn wInatlhtaH. narghlI’bej ‘ebmaj. tugh machoH’eghchu’be’chugh, vaj mevbej
tayqeq wISovbogh.

puqpu’lI’ tIqel. ngaj wejmaH DIS.

pItlh.


Rehoboth Beach wISuch

Sunday pov juHwIj wItlheD. qaStaHvIS wej rep wIleng. He Hut wIleng. pIj tlhe’ He Hut, ‘ej
Du’mey law’ DIlegh. ‘ach Dujmey puS DIlegh.

qaStaHDI’ cha’ rep, maleSmeH ‘ej maSopmeH
mamev. Do’Ha’ motlh bIQDep jablaw’ Qe’vam. Soj wImumDI’, bIQDep rur Hoch wISopbogh. ‘oQqar
mIQbogh vISop jIH, ‘ej bIQDep vImum. tI Sop SuStel, ‘ej bIQDep mum ghaH je.

tugh malengqa’. qaStaHDI’ wa’ rep, Rehoboth BeachDaq wIpaw. ‘uQ wISop (bIQDep wImumbe’!), loQ mayIt,
ghIq maQong.

Monday Italian soda vIneH, ‘ach Hoch ‘ay’mey ghajbe’ bIH jabbogh Qe’Hom. «DaH Italian soda vIchenmoHlaHbe’.
jIQoS.» jatlh tebwI’. «ram» jIjatlh.

Tuesday pa’majDaq cards wIQuj. lutmey wIbej je. Doctor Who Stargate je wIbej. mayIt ‘ej Suypu’ wISuch.
Qujmey taQwI’mey je ngev wa’ Suy. ‘aqroS legh SuStel ‘ej SeychoH. «yIlegh!» jatlh,
jach. jIlegh. ‘aqroSDaq rar jumqu’wI’. mep pig ‘oH. telDu’ ghaj. ‘ej puvtaH. «pig puvbogh!» jatlh SuStel. Dochvam muSHa’bej. meq ghajbej, ‘ach
vIngu’laHbe’.

Wednesday Italian soda vIneHqa’. «DaH wa’ chenmoHlaHbej» jIjatlh. Segh vIwIv ‘ej vIpoQ. «nuqDaq ‘oH club soda‘e’?»
pInDaj tlhob tebwI’. qaStaHvIS tup puS, nej. maloS. tagha’, jatlh tebwI’, «Do’Ha’, club soda wIghajbe’. Italian soda vIchenmoHlaHbe’.» loQ jIQeH. not chenmoHlaHchugh, qatlh HIDjolevDaq ghItlh?
toH, chaq chenmoHlaH Qe’ latlh. vItu’ ‘e’ vIHech.

Thursday bIQ HeHDaq wIjaH. qaStaHvIS cha’ rep bIQDaq maQuj ‘ej yavDaq maleS. bIrqu’ bIQ.
pa’majDaq wIcheghDI’, jIDoy’qu’law’. vaj jIQong. qaSDI’ bID rep jIvem. jIDoy’qu’.
jIQongqa’. qaSDI’ bID rep latlh jIvemqa’. jIDoy’qu’bej. ‘ach ghungchoH SuStel, ‘ej loQ
jIghunglaw’, vaj Qe’Daq majaH. mayIttaHvIS, maja’chuq. tujqu’ muD, ‘ej porghwIj DIrwIj je
meQlaHbej pem Hov. maQujtaHvIS, nuHIv pem Hov. wovqu’. tujqu’. ‘ej pIj bIQ
tlhutlhbe’lu’chugh vaj pIvbe’moHlaHbej pem Hov. Qe’Daq wIpawDI’, bIQ vItlhutlh ‘ej QIt ‘uQ
vISop. jIpIvchoHlaw’.

Friday nIQ wISoptaHvIS wImerlu’. wafflemey wISoprupDI’, Doch jum tu’ SuStel. syrup ngaSwI’Daq ghewmey
mach tu’lu’. ants bIH. chaq ghewmey Sop parHa’ ‘op nuvpu’, ‘ach jIHvaD ‘upqu’. vaj nIQmaj
wISoptaHbe’.

ghIq Italian soda wInejqa’. Qe’Hom rap wISuchqa’. tagha’ Italian soda chenmoHlaH chaH! vaj jIHvaD wa’ chenmoH
‘ej vItlhutlh. Do’Ha’ ‘eybe’.

Saturday tujqu’qa’ muD. qaStaHvIS pov, Suypu’ vISuch ‘ej nobmey vIje’. SuStelvaD pig puvbogh
vIje’. pegh. Saturday ram jevqu’. pa’maj wItlheDDI’ ‘uQ vISopmeH SIS. ‘ach loQ bIrchoH muD.

Sunday po Rehoboth Beach wItlheD. DungluQ ‘angghal qepHom wIjeS. ghIQ juHwIjDaq wIjaH. juHDajDaq leng neH
SuStel, vaj ghaHvaD nobDaj vInob. Quchqu’choH. muSHa’bej. taQqu’ ghaH.


Antarcticavo’ toDlu’

puH bIrqu’ yIqel. pa’ bIr law’ Hoch tera’ Daq bIr puS. pa’ HurDaq SIbI’ taDchoH DIr
mInDu’ je, bIH Qanbe’chugh Sut. qaStaHvIS wa’ DIS, jav jar Hurgh luSIQ DabwI’. rura’
pente’ wIqelbe’. DaqvetlhvaD Antarctica ponglu’.

Antarctica luDab nuvpu’. QulwI’ chaH. taghpa’ jarmey Hurgh
mej HochHom, ‘ach qaStaHvIS DIS Hoch ratlh ngan puS. ratlh chamwI’pu’ ‘ut, wa’ Qel, tejpu’
ngotlh je.

tera’ DIS cha’ SanID wej, Antarctica botlhDaq ropchoH wa’ loD. William McCue ‘oH pongDaj’e’. woj chamwI’ ghaH.
Hoq Daj SIQmeH Antarctica ghoSta’. ‘a ropqu’choH. ‘oy’qu’ burghDaj. yItlaHbe’. nuD Qel. loD HuH
ngejlu’law’.

jatlh Qel: tugh ropyaH’a’ ghoSbe’chugh loDvam, ghaytan Hegh.

‘ach chay’ mejlaH loD? ghorDaq He tu’lu’be’. qaStaHvIS jarmey bIrqu’, Antarctica botlhDaq puvbe’
muD Dujmey. botlhDaq Saqpu’ wa’ malja’ ghom neH. cha’ben Antarcticavo’ ropwI’ toD Kenn Borek Aviation, vaj Qu’
ta’qa’laH. Kenn Borek Aviation lurI’ QulwI’pu’. Qu’
lulaj ‘orwI’pu’.

bIrqu’mo’ muD, taD taSmey ‘ej QutlhbeHchoHlaHbe’ muD Duj Saqjan. jeDchoH nIn motlh.
chuchmo’ qapHa’laH rutlhmey. ‘ut muD Duj le’.

vaj Twin Ottermey lo’. vIHbe’ Twin Otter Saqjan: ghIrbe’ ‘ej Salbe’. vaj taDlaHbe’. nIn Sar lo’laH Twin Ottermey, vaj
taDchoHbe’bogh nIn luwIvlaH. chuchvaD rutlhmeyDaq Saqjan le’ jomlu’. Qu’ ta’beH muD Duj.

Qu’ ta’laH ‘orwI’. Sean Loutitt ghaH HoDpIn’e’; Jim Haffey ghaH HoD cha’DIch’e’. pIj Antarctica luSuch chaH ‘ej Hoq
lulaj. tlhej loS latlh ‘orwI’pu’.

Canada Calgaryvo’ puv cha’ Twin Ottermey. Doq bIH. raQpo’ quS luteqlu’ta’, raQpo’ pa’Daq nIn ngaSwI’mey tIn
lujomlu’. lojpa’ nIn, qaStaHvIS wa’maH wej rep puvlaH.

lengtaHvIS cha’ muD Duj, chorghlogh South AmericaDaq Saq.

Antarctica HeHDaq yev lengwI’pu’. Rothera waw’Daq Saq ‘ej loS. Antarctica botlhDaq ropwI’ tu’lu’ ‘a qabmo’ muD
Dotlh, qaStaHvIS vagh jaj RotheraDaq ratlhnIS toDwI’pu’. SabHa’choHDI’ muD Dotlh, mej wa’ Twin Otter. RotheraDaq
loStaH latlh. chach SIQchugh Duj wa’DIch, puvbeHchu’ Duj cha’DIch.

qaStaHvIS Hut rep wa’maH Soch tup puvlI’ Duj. puH botlhDaq, ghochchajDaq wa’ qelI’qam
‘aD leghmeH chuq ‘a chuchDaq SaqmeH yotlh luSam ‘orwI’pu’, ‘ej Saq. mejrup SID.

tentaHvIS SID ‘ej nIn lucheltaHvIS ‘orwI’pu’, QuQmey chu’Ha’be’. chu’Ha’chugh, jeDchoH
taSmey, vaj chu’qa’laHbe’.

nISqa’be’ muD Dotlh. ChileDaq SIDchaj luHIj, ‘ej ghaH luHaq Qelpu’. DaH pIvqa’.

Qu’ qelDI’ Sean Loutitt, jatlh: le’be’ — Qu’maj motlh ‘oH.


[HeD]

Qo’noS QonoS juH chegh

[juH]

tlhIngan Hol yejHaD juH chegh

[Duv]

Leave a Reply

This page was last modified on March 31, 2014 and is managed by:

The Klingon Language Institute is a nonprofit corporation and exists to facilitate the scholarly exploration of the Klingon language and culture. Klingon, Star Trek, and all related marks are Copyrights and Trademarks of Paramount Pictures. All Rights Reserved. Klingon Language Institute Authorized User.