ghItlhvam HIDjolev

chovnatlh cha'maH loS

DIS cha'SaD wa', jar wa'maH cha'

Europe Holmey DIS

DISvam lop le' cher Europe DIvI' (European Union). European Year of Languages 'oH lopvam per'e'. vImughmeH «Europe Holmey DIS» vIlo'. qaStaHvIS DIS cha' SaD wa' qepmey yupma'mey je tIvlaH (pagh SIQlaH) Europe nganpu'. qatlh lopvam qaSmoHlu'? ngoQmey law' maq lop che'wI'pu'. jatlh: «Sarqu' Europe Holmey. bIH DIquvnISmoH». jatlh je: «English Hol neH HaDqanglaw' ghotpu'. HaDlu'meH Qatbe' latlh Holmey. Holmeyvetlh HaDqangchoH ghotpu' 'e' wIqaSnISmoH.» chaH tungHa'meH chay' vangnIS qummey? qechvam qel neHlaw' Europe DIvI'. (latlh De' botu'meH www.eurolang2001.org/eyl yISuch.)

PolandDaq qepmey puS luqaSmoHlu'. qen wa' qep wIjeSmeH CracowDaq maleng, jIH jupwI' je. 'e' nura'  pInma'. Do'Ha', Hol tejvaD loQ qetlh HochHom SoQmey. ngermey ngo' chovta' pagh, ngermey chu' maqta' pagh 'ej qechmey motlhbe' qelta' pagh. Qochbe'chuq jatlhwI'pu' 'ej quSDaq ba' HochHom. nuq wIghojlaH? «EuropeDaq Holmey law' jatlhlu'», «Qatqu' English Hol». Hu'tegh, chong qechmeyvam, qar'a'?

jIboHmo', SoQmey vI'IjtaHvIS jIqImchu'be'. loQ jInaj 'ej loQ qechmey pIm vIbuS. nuq vIbuS? jISIv: rInpu'DI' SoQmey maSopmeH nuqDaq maghoS? Qe' QaQ wIwIv 'e' vItul. tIQ 'ej 'IH Cracow. naDev 'ampaS ngo' tu'lu'. noyqu'. Jagiellonian 'ampaSDaq HaDta' Copernicus. jISIv: 'ampaS qach tIQqu' wISuchmeH yap'a' poHmaj? veng pong vIqel je. Cracow 'oH English pong'e'. pIm pongna'Daj: «Kraków». cha'logh mu'vam jIjatlh'egh 'ej ngoD Daj vItu': tlhIngan mu' rurlaw': «Qa'quv». majQa'! veng quvvaD QaQ pongvam.

pay' jInaj 'e' vImev 'ej jIbuSqa'. «Do'Ha', DaH Latin Hol Esperanto Hol je DIlo'qangbe'law'» jatlh wa' jatlhwI'. pIm vuDwIj: «Do'Ha', tlhIngan Hol HaDqang ghotpu' puS!» jatlh je jatlhwI'vam: «ngoDvam yIqel! vagh vatlh DIS ret 'ampaSvamDaq HaDlaH ghotpu' nov 'ej mughwI'pu' poQ pagh. Latin Hol Sov Hoch.» loQ jIQoch: DaH  mughwI' law' lupoQlu' net Sov 'a ghu'vam vIpaybe' jIH. pIj mughwI' vIDamo' Huch vIbajlaH. qaStaHvIS qepvam SoQmeychaj muchmeH loS Holmey lo' jatlhwI'pu'. QoymeH jan ghaj Hoch jeSwI' 'ach qep pa'Daq mughwI'pu' yaHmey luleghbe'lu'. latlh pa'Daq vum chaH. latlh SepDaq vumlaH! DaH 'e' chaw' cham. mughwI'pu' le' chaH. Hoch SoQ lu'IjtaHvIS, SIbI' lumughlI'. tlhoS quq SoQ ja'lu'lI'bogh SoQ mughlu'lI'bogh je. Dojqu' laHvetlh.

maDo'. tagha' 'ampaS qach tIQ wIghoS. qachvam ngo' law' Hoch ngo' puS. janmey'e' lo'ta'bogh Copernicus leghqang jeSwI'pu' 'ach DaHjaj qItbe'. vaS'a' neH wI'anglu'. Dunqu'. Dat Hewmey, naghmey beQ law' je DIlegh. 'ampaS che'wI' quS'a' wIHo'. voDleH quS'a' rur. maHvaD Dochmeyvam Del DevwI'. vaS'a' wI'elta' DevwI'vaD jatlhta' qep che'wI': «Polish Hol yIjatlh. mu'meylIj DImughlaH». lobHa'ta' DevwI'. «Qo'!» jang 'ej jatlhchoH. Latin Hol lo'be'ba', Esperanto Hol lo'be' je. English Hol jatlhbej! monchoH 'op jeSwI'pu' 'ej pagh mer ngoDvam. English mu'mey Sovba' DevwI' 'ach mu'tlheghmey chenmoHtaHvIS loQ Huj pabDaj. jatlh: «To this university traveled many scholars. Here studied Copernicus.» toH: tlhIngan Hol pab lo'law' DevwI'. ghaHvaD ngeDba' tlhIngan Hol pab. QuchchoH tIqwIj. Qatlhbe' tlhIngan Hol 'e' tu'ba' ghotpu' 'op. chaq wa' jaj QatchoH tlhIngan Hol. va! chaq nem «tlhIngan Hol DIS» lop Europe DIvI'!