Qo'noS QonoS

chovnatlh cha'maH wa'

DIS cha'SaD wa', jar Hut


ghItlhvam HIDjolev


tagha' qep'a' vIjeSlaH


pongmey bIH mu'meyvam'e': maHvatlh, Holtej, nI'taQ, Quvar valer, taj'IH,
Volker, Sabine, ghunchu'wI', Snake, 'angghal

USADaq qaSpu' Soch qep'a'mey. Do'Ha' jIlengmeH Hopqu'
Sepvetlh. wa' ben HolQeD vIlaDtaHvIS, De' Dun vItu':
BelgiumDaq qaS qep'a' chorghDIch. jIQuchqu'! qep'a'vam
vIjeSlaHbej. tagha' tlhIngan Hol jatlhwI'pu' vIqIHlaH. tlhIngan Hol
vIqeqmeH 'eb QaQ vIghaj.

BelgiumDaq jIlengtaHvIS jISeyqu' 'ej jIbItqu'. wej tlhIngan
Hol vIjatlhlaH. mu'mey puS neH vISov. mulajqang'a' jatlhwI'pu' po'? 'e'
vISovbe' 'ach nuch jIHbe'bej. Hol SuvwI' jIH 'ej batlh qaDmey vIlajrup.
qaDna' 'oH qep'a'vam'e'.

taghpa' 'uQ'a' vaSDaq jIjaH. pa' ba' nuvpu' law'. tlhIngan Hol lulo'taHvIS
jatlhchuq. tlhIngan Hol QIch vIghov 'ach mu'mey vIyajbe'. jIbItqu'mo'
jIbuSlaHbe'. Qam wa' loD 'ej jIHvaD quSDaj
qeD. muquvmoHba'. «qatlho'» ghaHvaD jIjatlh. tlhIngan Hol vIlo'
'e' vInID. jeSwI'pu' pongmey vISov vIneH. «naDev pagh vISov»
jIjatlh. Hagh wa' nuv. «pagh jIH» jach. «pagh»
'oHbej pongDaj'e'. tlhaQqu' ghu'vam. Do'Ha' vIjangmeH mu'mey tlhaQ
vIlo'laHbe'. wej jIpo'.

tugh tachDaq maghoS. HIq vIychorgh joq jablu'taHvIS paw tlhInganpu':
loDpu', be'pu', ghu je. Germany luDab chaH. Dojqu'
Hoch. 'IHqu' HIpmeychaj. nuHmey law' qeng Hoch. betleH mach 'uchtaH
ghu. wa' jaj SuvwI' qu' mojba'.

Sepmey law'vo' ghoSta' qep'a' jeSwI'pu'. QIt Hoch vIqIH. HaDrupqu'
jatlhwI'pu' po'Ha', tuvqu' yejHaD 'utlhpu'. qaStaHvIS qep'a' majatlhchuq
'ej lutmey Daj wIja'. Qujmey pIm wIreHtaHvIS mu'mey Sar DIloy
'e'wInID. mabomqu' je. pIlmoHbogh bommey DIbom 'ej bommey tlhaQ
DIbom. tlhIngan bommey law' lutu'lu'. wa' jaj Qe' QaQ wItu'. pa' Soj 'ey
jablu'. ro'qegh 'Iwchab rur wa' nay'. qagh rur latlh. chejDu' jatDu' je Sop
taj'IH, qurgh wIb vISop jIH. ngal, char 'ej tlher Sojvam. tayba' Brussels
'ach tlhInganpu' leghbe'bejpu' vengvam nganpu'. nuleghDI' merqu'bej. mev
Dujmey, mev yItwI'pu'. puqpu' mach DIghIjchoHlaw'.

nuHmeychaj lo'laHbej Germany tlhInganpu'. betleH vIyanlaHmeH
mughojmoH Sabine. jIlev 'ej jIngol 'e' vInID. Qatlh Qu'vam:
tInqu' 'ej 'ugh betleH. chay' meqleH Qachlu'? meqleH pep Volker'ej mIw mu'ang.

jaj Qav, tlhIngan Quch munob Germany be'pu'. vItuQmeH
muboQ. QuchwIj leghDI' ghunchu'wI' jatlh «Quch 'IH
Daghaj». jIlegh'egh. lugh ghunchu'wI'. DaH tlhIngan vIrur. ngugh paw
Snake. vIleghDI' jImerqu': nIb QuchDaj QuchwIj je. toH,
loDnI'wI' ghaHbej! taHjaj qorDu'maj!

tlhIngan Hol yejHaD maH. tlhIngan Hol wIjatlhchu' wIneH. tlhIngan Hol
Sovchu' pab pInpu' net Sov, 'ach 'oH qeqchu' Hoch jeSwI'pu', ghu je. wej
jatlhlaH, 'ach tlhIngan QIch lo'choHlaw': «'a'»,
«wa'» je jatlh 'ej «gh» qeqtaH. jIjatlhtaHvIS
jIQaghqu'. mu'tlheghmey vIchenmoHmeH mu'ghomwIj vIlo'nIS. jIDo': mu'ghom
gherta'bogh munobpu' vaHmatlh. lI'qu' mu'ghomvam: Hoch mu'mey ngaSmo' 'oH
naD pIn'a"e'.

tlhIngan Hol Sovchu"a' jatlhwI'? Sov tobmeH Qu' le' 'oghta' Holtej
'utlh. loS patlh ghaj Qu'vam. patlh wa'DIch chavlu'chugh
«taghwI'» mojlu', patlh cha'DIch chavlu'chugh
«ghojwI'» mojlu', patlh wejDIch chavlu'chugh
«po'wI'» mojlu', 'ej patlh loSDIch chavlu'chugh «pab
pIn» mojlu' ('ach wej Qu' loSDIch 'oghlu'ta'). patlh wa'DIch vIchav
'e' vInID 'ach jIluj jay'! qaStaHvIS jaj veb jInIDqa' 'ej jIQap. jIQuchqu'
'ej jIlop. DaH taghwI'na' jIH. patlh cha'DIch bajta' juppu'wI' chu':
maHvatlh nI'taQ je. Do'Ha' luj Quvar valer: wa' vatlhvI' neH Hutlh. baQa'!

rInpu' qep'a' chorghDIch. tlheDpa' 'angghal yIH munob. «yIH ghajnIS
Poland» jatlh. chaq lugh, chaq qID ghaH. batlh nobvam
Huj vIlaj. 'ach juHwIjDaq jIcheghtaHvIS yIH neH vInge'be'. mupIlmoHchu'pu'
qep'a'. tlhIngan Hol vIHaDtaH vIneHbej.


yejHaDvo' jabbI'ID

DISvam qaS lot net Sov. tInbogh qachmey potlh HIv nuchpu', 'ej nuv law'
HoH. nuv HoHlu'pu'bogh DIqel 'ej qorDu'chaj DIvup tlhIngan Hol
yejHaD. HIvDI' qab 'angvIpbogh nuch mataHvIpQo', 'ej chotwI' ngu'lu' 'ej
noDchu'lu' 'e' wIHarchu'. chunwI' HoHlu'pu'bogh DIqawtaH 'ej DIquvmoHtaH.


[HeD]

Qo'noS QonoS juH chegh

[juH]

tlhIngan Hol yejHaD juH chegh

[Duv]