qoqmey

qonta' Holtej

jInajlaH, qar'a'?

jIQuptaHvIS 'ej The Jetsons vIbejDI', muvuQchoH qoqmey. ngugh pa'wIj Say'moHbogh vay''e', DuSaQ Qu'wIj vIta' 'e' muQaHbogh vay''e', «qeylIS mInDu'» Qujbogh vay''e' je vInaj. DaH jInenmo' (ahem), jInajtaH, 'ach pIm qoq Qu'. juHwIj Say'moH, yaH Qu' vIta' 'e' muQaH, 'ej «mu'qaD veS» Quj.

le' qoq vInajbogh. Hol chu' vIqeqmeH maja'chuqlaH jIH qoq je. qechvam vIqelmo' «De'wI' HolQeD» vIHaD. ben law' MOO qoq chenmoH ghojwI'. (MUSH rur MOO. MUSH 'oH KEVE'e'.) DIvI' Hol neH jatlh qoqvam, 'ach MOO leHmeH tlhIbbe'. MOODaq lenglaH qoq, Dochmey leghlaH 'ej nuDlaH, latlh QujwI'vaD jatlhlaH. pa' le' SammeH QujwI' lurgh chuplaH, qaSbogh wanI'mey 'ej Dochmey leghbogh DellaH, 'ej latlh QujwI'vaD QInmey HIjlaH. 'Itlhbe', 'ach qoq ghunmeH Qu' vItIv.

tugh nargh nu'oSbogh De'wI' qoqmey 'e' maq cham pojwI'. leSSov ghaj cham pojwI' 'e' qap. nuSovchu' qoqvam. Doch DIparbogh 'ej DIparHa'bogh Sov; lengmeH wIvmaj Sov; je'meH wIvmaj Sov. tlhIngan ghe'naQ Dabej DaneH'a'? chaw' ngevwI' rI', Sutlh, 'ej chaw' je' qoqlIj. ghe'naQ qach DajaHmeH DalengnISchugh, lupDujHom nab (pIj lengwI' mI'lIj qaw). qaStaHvIS ram bIratlhnISchugh mebpa' nab. SoHvaD jeylIj chaw'lIj je ngeH qoq. jInajbej!

chaq qay' Hung. De'lIj'e' leHbogh qoq nIHlu'chugh qay'bej. De'vam luSuq luneHbej batlhHa' Huqbogh ngevwI'. DaH jInajHa'.

qen qoq Doj vIlegh. vIleghDI' jIQuptaHvIS yabwIjDaq qoq vIchenmoHbogh vIqawchu'. qoqna' 'oH (De'wI' qoq 'oHbe'; ghunlu'be'). rutlh ghaj; vIHmeH rutlh lo'. letlh toSlaH! 'ej jatlhlaH. «iRobot» 'oH pongDaj'e' (www.irobot.com). juHlIjDaq yItlaH, lojmItlIj QorwaghlIj je nuDlaH, SajlIjvaD jatlhlaH, 'ej latlh ta'laH je. 'Itlhbe', 'ach matlhetlhbej.

chaq jInaj, 'ach wa' vIneH. jInajlaH, qar'a'?

taHwI' cha'

qonta' nIchyon

qen rIn taHwI' cha' lut lablu'bogh. QujHey 'oH lut'e'. puH 'ItlhHa'Daq wa'maH jav ghot luweghlu'. qaStaHvIS Hoch lut 'ay', 'ovchuq jeSwI'pu'. qaStaHvIS lut bID wa'DIch 'ov nawlogh. qaStaHvIS cha'DIch, nIteb 'ov ghot.

pop HevmeH, qaDmeymo' 'ov . roD Soj, Soj SuqmeH luch ghap 'oH: po'Ha'mo' jeSwI'pu', puHDaq Soj lutu'laHbe' chaH 'ej ghung. ghIq, ghImlu'be'meH DIb bajmeH 'ov. rIntaHvIS lut 'ay', wa' ghImnIS nawlogh. ghot lughImbogh wIvmeH ghom nawlogh. taHwI' Qav wIv jeSwI'pu' bID Qav.

qatlh Daj taHwI' lut? Dup Quj 'oH. taHmeH vay', latlh ghImnISmoH. 'ach ghaH wIvmeH ghotpu''e' qen ghImmoHpu'bogh ghaH, chaH parHa'nISmoH je ghaH. vaj cheplu'meH to' wIvnIS ghaH --- 'ej valchugh, to' lISnIS je. toj'a' ghaH? vaj boq ngoS, lI'DI' ghu' --- 'ach qeHchoH Hu' boqwI'. vIDHa''a' ghaH? vaj parHa' HochHom --- 'ach ghaH lutojrup je latlh, 'ej lughImrup, parHa'wI'vo' pop Qav bajpa' ghaH. HoS'a' ghaH? vaj popHommey bajtaH 'ej HoS'eghmoHtaH; 'ach ghaH 'ovlaHbe'pa', ghImrup latlh. DajHa''eghmoH'a' ghaH? vaj ghImlu'taHvIS, ghaH ghImlu'be' DajHa'mo' je; 'ach chentaHvIS boq, HurDaq ratlh ghaH.

Qap 'Iv? rInDI' lut wa'DIch, Qap Richard Hatch. 'ong 'ej toj. vaj ghaH lupar lut bejwI'pu'. 'ach pop bajba', bajmeH vummo' 'ej 'oghmo' 'ej noHchu'mo'. boq wIv 'ej SeH. ghaHvaD boq Hur ghot voqmoH. vuDna'Daj pegh, 'ej bejwI'pu'vaD neH tey'. valmo' chep DaH HochvaD 'e' HarmoH, 'ach Do'qu'mo' chep je: pIHQo' latlh nawlogh. pIj latlh ghot wIvmey wuvnIS. wa'logh tlhoS ghaH ghImlu'. 'ach qun qon charghwI' net Sov.

rInDI' lut wa'DIch, patlh cha'DIch Suq Kelly Wigglesworth. boq jeS 'a jeSqangbe': toj, 'a tojnIS 'e' lajQo'. vaj ghaH lulajHa' boq, 'ej lughImrup. Qom 'e' tlhojmo', HoSchoH 'IwDaj, 'ej ghImlu'be'meH Hoch DIbmey baj. 'ach Susan Hawk'e', latlh boq ghot'e', maghlaw'mo' Kelly, Susan QeH'a' baj. Dun Susan SoQ Qav. 'ej rInDI', yapbe' HoS: ghob tlhoS 'e' wIvbogh ghot luvuvHa' latlh, 'ej 'ong chIch 'e' wIvbogh ghot luvuv.

lut wa'DIch chenmoHtaHvIS lIngwI', po'. Dun ghotpu', DuQ wIvmeychaj, 'ej bejwI'pu'vaD chu' Hoch. wa'DIch QaQ law', cha'DIch QaQ puS. cha'DIch jeSwI'pu' yajlu'be' bejlu'taHvIS, nab chaH 'e' 'angQo'mo' lIngwI'. ja'chuq neH chaH, to' luqelbe'taHvIS, 'e' 'angQo' je. nIteb lutlI' 'ogh lIngwI'; lutvelth 'angmeH Qutlhbogh 'ay'mey neH wIv ghaH. 'ej pIj, tlhoy' nap lutvetlh. lut chenmoHtaHvIS yepHa'choH; vaj Dal bID cha'DIch. 'ej loQ Dal wej ghot Qav; wa'DIch boq Dun rurbe'. Qap Tina Wesson, 'ej QapHa' Colby Donaldson. Qap chaH boq jeSba'mo' chaH, Keith Famie je, 'ej nawloghchajDaq latlh boq Qaw'mo'. HoS 'ej Qup Colby, 'ej Hoch qaDmey jey. 'ach 'ongqu' Tina; ghaH ghIm 'e' wIv pagh, 'ej HochvaD QorghwI'Hey Da. ghaH 'um law' Colby 'um puS, ColbyvaD 'e' ponlaw'. vaj 'ongchu'. 'ach quv 'ej vIDHa' ghaH DaH 'e' qap; 'ej rurchuq DupDaj, Richard Dup je, 'e' chIDQo' ghaH. 'ong Richard, tojmo', 'ej tlhaQ, 'ong bejwI'pu'vaD 'e' tey'taHvIS. 'ongqu' Tina, tojlaw'mo', 'ej latlhvaD, bejwI'puvaD je 'e' tey'be'mo'. ghaytan 'ongbe' 'e' lajmeH pon'egh je.

Daj qech, 'ach DaH law'qu' chIch 'oH rurbogh lutmey'e'. ngeDlaw' Sarvetlh lut chenmoHmeH Qu', lut 'oghwI' DIlbe'lu'mo': nIteb lut lu'ogh jeSwI'. 'ach DajmeH lut, vumnIS lIngwI'. 'ej 'ay'mey 'anglu'bogh wIvchu'nIS: lut luyajnIS bejpu'wI', 'ej vangmeH 'ej wIvmeH jeSwI'mey mo'mey yajnIS je bejpu'wI'. 'e' luyajmoHQo'mo' lIngwI'pu', QIv HochHom lutvetlh. 'ej rut QapHa'mo' lIngwI', QIv je taHwI' cha' lut.